Artur Zheji shkarkohet nga posti i drejtorit të përgjithshëm i Radio-Televizionit Shqiptar. Këshilli Drejtues i RTSH-së vendosi dje me gjashtë vota pro dhe asnjë kundër, shkarkimin e Zhejit për një sërë motivacionesh, ndër të tjera edhe shkelje të ligjit. Zheji ishte i pranishëm në mbledhjen e Këshillit Drejtues të RTSH-së dhe e cilësoi vendimin e dhënë të nxituar dhe të dhënë në mënyrë ushtarake. Një ditë më parë, një prej anëtarëve më të rinj të këshillit, Mero Baze paralajmëroi në një letër publike shkarkimin e Zhejit. Duke theksuar se ishte gjetur para një situate befasuese lidhur me degradimin e profilit publik të këtij institucioni, Baze i propozoi Këshillit të votojë për shkarkimin e drejtorit të përgjithshëm të RTVSH-së, Artur Zheji dhe t’i hapë rrugë konkursit për zgjedhjen e drejtorit të ri, i cili bashkë me Këshillin Drejtues, duhet të bëjë projektin e strukturës së re programore, organizative dhe ngritjen e profilit të RTVSH-së në tregun e medias. Ai përmendi se tre përfaqësues zyrtarë të sindikatës së RTVSH-së thonë se RTVSH-ja ka abuzuar me administrimin e fondeve të veta dhe ka favorizuar rrethe klienteliste të drejtuesve të saj, të lidhura sidomos me drejtorin e përgjithshëm. Menjëherë pas shkarkimit, ish- drejtori i RTSH-së u shpreh për News 24.
Zoti Zheji, si e pritë vendimin për shkarkimin tuaj nga posti i drejtorit të përgjithshëm të RTSH-së?
Të them të drejtën, më shumë se sa e prita, unë e përjetova këtë vendim si një nga vendimet me procedurën më të nxituar dhe më ushtarake që kam përjetuar ndonjëherë në jetën time profesionale dhe mendoj që kemi të bëjmë me paradhomën e dhunimit të principit më të lartë që ka një media, garantizmi. Në momentin që drejtorit të përgjithshëm nuk i garanton të drejtën duke shkelur të gjitha procedurat ligjore që parashikojnë në ligj për ndërprerjen e mandatit me shkarkim të paparalajmëruar nga Këshilli Drejtues, mendoj se në të njëjtën kohë kemi edhe të drejtën për të “paragjykuar” një dhunim të mëtejshëm të frymës garantiste që sipas meje, është tulla më e rëndësishme që bashkë me stafin që kam drejtuar prej 4 vitesh, jam munduar të vendos. Më vjen keq që ta pohoj këtë gjë, nuk mendoja se do ta pohoja një gjë të tillë, por faktet janë kokëforta
A i**** ju të pranishëm në këtë mbledhje?
Po, isha i pranishëm në mbledhje dhe me praninë time pashë të gjithë këtë që jam duke dëshmuar për ju.
Cilat ishin arsyet që u shkarkuat?
Motivacioni është për shkelje të proceduarve dhe disa të tjera, që u bënë të ditura. E përgjithshme ishte se dukej si një gjetje e paraprogramuar më parë dhe e fabrikuar diku tjetër.
A pati anëtarë të pranishëm që ishin në mbështetjen tuaj?
Ishte vetëm një dhe nuk ishte në mbështetjen time, por në mbështetje të procedurave ligjore, që duhet të zbatohen në raste të tilla dhe që nuk u respektuan në rastin konkret.

Informacione eshte marre nga Gazeta Shqiptare