"Më në fund arritëm të rishohim yjet..." Tepër? Ndoshta po. Por teprimi qëndron në momentin kur Juventusi, pas një fillimi të shkëlqyer të sezonit, nxjerr fytyrën jashtë ujit dhe motivohet për të filluar një kampionat të ri, duke harruar shenjën "minus" para renditjes së vet. Juventusi i shëmtuar, në Trieste, është e kotë të bëhet fjalë. Por edhe krejtësisht praktik, goli i zakonshëm dhe pastaj drejtimi në mënyrë cinike të ndeshjes, përvojë që frenon vrullin e kundërshtarit. Në këtë rast, fjalët e Didië Deshampit u kushtohen aftësive të mrekullueshme të Triestinës, sesa ekzalton të tijtë: "Përgëzime për ata, nuk na lejuan të dilnim në lojën tonë. Nëse patëm pak raste, është sepse nuk arritëm të ngremë ritmin e ndeshjes. Duhet të kishim lëvizur më shumë, por nuk kishim fuqi për ta bërë. Nuk ishim shumë të bukur, por në këto momente rëndësi ka vetëm të fitojmë." E qartë, apo jo?
INATI - Në një përkthim të lehtë do të thotë se Juventusi po luan dobët, por për fatin e tij të mirë arrin vetëm të fitojë. Kjo ka sjellë reagimin e "klanit" të Triestinës. Është për t'u kuptuar, sepse ata luajnë mirë, shënojnë një gol që duket i rregullt dhe ia anulojnë... Është e dobët pjesa e parë juventine, me përjashtim të rastit të golit të Zanetit. Deshampi shfrytëzon rastin dhe vazhdon të flasë mirë për kundërshtarin. Në fund, është për të folur keq për skuadrën e tij.
DEL PIERO - Por nëse Juventusi buzëqesh, në ekip ka edhe fytyra të trishta. Zëvendësimi i kapitenit nuk është çmuar nga ky i fundit. Pa bërë aspak ndonjë gjest të pakuptimtë, ai i është drejtuar direkt tunelit që të çon te dhomat e zhveshjes, pa u ulur fare në stol. Trajneri francez e zhdramatizon gjendjen: "Veproi kështu që të mos ftohej, - qeshi Deshampi që më pas shton. - Po përjeton një moment jo shumë të lehtë. Cilësia e tij nuk diskutohet, por është e pamundur të qëndrosh i pandjeshëm ndaj trysnive të jashtme. Goli i 200-të e mundon? Sa më pak mendohet, aq më shpejt vjen. Dhe kur të vijë, Aleksi do të çlirohet. Zëvendësimi? Përpiqem të bëj zgjedhje për skuadrën dhe të gaboj sa më pak të jetë e mundur. Shpresoj t'ia arrijë." Deri tani thuajse ia ka arritur, sepse rezultatet i japin të drejtë Deshampit të krenohet dhe të justifikohet me zgjedhjet që bën. Por nëse problemi kryesor, ai i daljes nga "tuneli", kaloi, duket se zëvendësimet e shpeshta të kapitenit po shndërrohen çdo javë në një çështje.
KRISTIANO ZANETI - Golashënuesi i së shtunës pasdite është po ai i së hënës së shkuar në mbrëmje: nga Trevizo në Trieste vendos sërish ai, Kristiano Zaneti. Gol "fotokopje" që vlen 6 pikë të rëndësishme. I pari që mrekullohet është pikërisht ai: "Asnjëherë s'kam shënuar 2 gola në 5 ditë. Besoj se është vërtet një rastësi. Asnjë skemë, kështu ndodhi, godita dhe topi shkoi në rrjetë. Sigurisht, nuk është se luajtëm shkëlqyeshëm, por tani rëndësi ka të marrim vetëm pikë. Kur të jemi para, do të fillojmë të mendojmë edhe për spektaklin." Për golin e anuluar të vendësve, Zaneti s'është shumë dakord: "Nuk u anulua. Gjyqtari vërshëlleu para, të gjithë ndaluam, ndaj nuk ishte anulim; vetëm një goditje dënimi për një ndërhyrje të gabuar të lojtarit të Triestinës." Po, e vërtetë, po çfarë faulli ishte ai, kur ndaj Kielinit nuk pati fare shtyrje?