U duk se gjithçka do të rikthehej në normalitet, se fitoret do të zhbllokoheshin edhe në kampionat me gjithë sulmuesit dhe loja spektakolare do të mbizotëronte. Por, me përjashtim të kësaj të fundit, Milani është dorëzuar në "San Siro" përballë Palermos, ku fati, shtylla, traversa, por edhe pritjet e portierit Fontana, kanë sjellë humbjen e parë në këtë sezon. Pa i hequr meritat skudrës së Guidolinit, që tani renditet në vend të parë të tabelës me 15 pikë së bashku me Interin, mbrëmë janë shfaqur sërish në fushë "fantazmat" e javëve të fundit. Milani vazhdon sërish të mos shënojë, pavërsisht se Kaka ka bërë të pamundurën për të shënuar dhe shërbyer për shokët e tij. Siçilianët e zhbllokojnë të parët rezultatin me anë të Breshiano. Pikërisht këtu vjen "furia" kuqezi, me disa aksione të bukura për gol, por braziliani Amauri dyfishon rezultatin me portën bosh, pas një pritjeje të pasigurtë të Didës nga një goditje e Breshianos. Koha nuk mjafton më dhe situata te Milani sa vjen e bëhet më alarmante.
Thuajse të vjen dëshira të shkosh në plazh. Fatkeqësisht jemi në nëntor. Po të mos ishte për Atalantën, ia vlen të bësh një zhytje për t'u çliruar nga mërzia. Ky kampionat italian është vërtet i shëmtuar: i ekuilibruar aq sa duhet, jetim nga mungesa e Juves dhe me një Milan të vonuar, të mërzitshëm, steril dhe të ngadaltë. Pak ngre peshë barazimi i Interit ndaj Udinezes së mirëorganizuar, apo frenimi i Romës nga dëshira e çmendur e Del Nerit. Më tepër peshë ngre mungesa e dueleve të vërteta italiane, në një të diel ku busulla e kuriozitetit sportdashës padyshim që tregon andej nga duelet si Mançester-Liverpul apo Real M.-Barcelona. Seria A, një kampionat që duhet të presim nga Atalanta për të na dhuruar emocionet e futbollit.
Interi pa Adrin, e njëjta muzikë - Normalisht, në një kampionat kaq shterpë nga ana teknike, edhe një barazim në Udine i mjafton Interit për të mbajtur të pandryshuar kryesimin, me dy pikë më shumë se Roma. E pandryshuar edhe mënyra e lojës zikaltër. Adriano veshi xhinset dhe u nis për pushime nga Morati (lum si ai), Krespo nuk ishte në formën më të mirë, Kruzi s'mundet gjithmonë të bëjë mrekulli, kështu që një 0-0 kundër Udinezes edhe mund të pranohet. Sidomos kur përballë ke një lojtar me vlera si Di Natale apo dinakun e përhershëm Iakuinta, si dhe "plakun" Galeone që gjithmonë di një rreng më tepër se "djalli".
Toti shënon, Del Neri ndal Romën - Më lehtë mund të shpjegohet ajo që ndodhi në "Olimpiko". Fati deshi që Del Neri të kthehej në atë stadium ku nuk e deshën kurrë. Pastaj treshja e gjyqtarëve me në krye Dondarinin u bënë protagonistë: i rregullt goli i parë i Totit, por duhej anuluar ai i Pelizierit. Me drejtësi duhej të kishte fituar Roma, por fati e di që ndonjëherë duhet të jesh më i fortë nga të gjithë. Roma nuk është akoma. Barazimi 1-1 në "Olimpiko" është një ngushëllim i pakët: rasti për të parakaluar Interin rrëshqiti thuajse pa u vënë re.
TE TJERAT - Në fund, emocionet më të bukura i dhuruan ata që para disa vitesh në radio jepnin rezultatet e fushave të tjera: duke filluar nga Bergamo, ku Atalanta përmbys disavantazhin 0-2 dhe mposht 3-2 Sampdorian. Protagonist ishte Kristiano Doni, shembulli i mrekullisë së drejtuar nga trajneri Kolantuono: vendi i tretë dhe dhjetë pikë në renditje mjaftojnë për të. Dhjetë me yll.
Ajo që na bindi në këtë fundjavë, ishte Fiorentina, me një 3-0 kundër kalabrezëve, ku rumuni Mutu shënoi një eurogol. Në pritje të uljes së penalizimit, Rexhina kthehet në shtëpi pa pikë dhe mbetet me -7 në renditje. Për t'u "lënë në klasë" është Lacioja e Delio Rosit: humbja 3-1 në Leçe (fushë asnjanëse) kundër Katanias është sinjali i një skuadre ndoshta mendjemadhe.

Milan - Palermo 0 2
Shënues: Breshiano 48', Amauri 72'
Milan: Dida, Kafu, Jankulovski (Maldini 60'), Nesta, Kalaxe, Pirlo, Gatuzo (Broki 75'), Sedorf (Oliveira 78'), Kaka, Inzagi, Xhilardino. Tr: Ançeloti.
Palermo: Aliardi, Zakardo, Biava, Barzali, Guana Korini, Simplisio, Breshiano, Diana, Di Mikele (Kasani 77'), Amauri. Tr: Guidolin.
Gjyqtar: Pieri.