Ronaldinjo te Milani? Ndoshta! Është mendimi i Rino Gatuzos që nuk fsheh entuziazmin për ardhjen e mundshme të yllit brazilian. "Për Ronaldinjon do të isha i gatshëm të vrapoja si një i çmendur. Ai dhe Kaka do të ishin maksimumi. Besoj se në Itali nuk mund t'i vihet kufi Kakasë, rëndësi ka që meriton të jetë i fortë."
Gatuzo vjen nga një kurorëzim i shkëlqyer me titullin botëror, duke përfunduar në listën e 50 kandidatëve për fitimin e "Topit të artë": "Është një gjë e çuditshme, shumë e çuditshme, edhe pse më ka dhënë një karikim të madh, - thotë ai. - Gjithsesi, një si unë nuk do të arrijë kurrë të fitojë "Topin e artë", duhen cilësi të tjera. Shpresoj ta fitojë Bufoni ose Kanavaro."
Gatuzo është cilësuar nga shumë njerëz si pasardhësi i Maldinit si kapiten i Milanit. Por ai bën modestin: "Nuk mendoj para se Maldini të tërhiqet nga futbolli. Të mbash shiritin e kapitenit, mund të jetë e vështirë në një skuadër me kaq shumë kampionë, por është një aspekt që e përjetoj i qetë." Në fund një batutë për titullin: "Nëse nuk do t'i takojë Milanit ta fitojë, shpresoj në një surprizë të bukur. Ndoshta pësoj një goditje në kokë dhe ju them që uroj ta fitojë Interi."