FIER - Një 43-vjeçar nga qyteti i Fierit, i dyshuar për përdhunimin e një 16-vjeçare është mbajtur për plot 18 orë në qelitë e Komisariatit të Policisë ku edhe është keqtratuar nga efektivat blu. Pas hetimeve ai ka rezultuar i pafajshëm dhe është lënë i lirë. Agur Avduli është marrë me forcë në banesën e tij rreth orës 23.30 të së mërkurës. I habitur, ai ka kërkuar arësyen, ndërkohë që i është thënë se ishte denoncuar për përdhunim. Babai i dy fëmijëve ka kundërshtuar të ketë kryer një krim të tillë, por policët e kanë ballafaquar me vajzën e quajtur Ina Gega nga fshati Daullas i Fierit. Adoleshentja ka konfirmuar, se 43-vjeçari ishte personi që kishte kryer marrëdhënie seksuale me të. I shokuar nga dëshmia e vajzës, Avduli është shprehur se nuk e kishte parë dhe as e njihte 16-vjeçaren. Madje ka sqaruar se kishte qenë gjatë gjithë kohës në punë dhe se kishte dëshmitarë. Por reagimi i tij, ka inatosur policët që po e merrnin në pyetje, ndaj edhe kanë rrahur. Agur Avduli është lënë i lirë vetëm pasditen e së enjtes. Kreu i bluve të Fierit, Arjan Bozho thotë se e shoqëruan Avdulin pas denoncimit. Ai shprehet se do të merren masa ndaj vartësve të tij që ushtruan dhunë mbi 43-vjeçarin e pafajshëm.