Mjaft kompani vendase janë të lidhura me shoqërinë Telekomin për të përfituar shërbimin e internetit. Por ky shërbim të lë shumë për të dëshiruar. Mjaft kompani që janë të lidhura më Telekomin për shërbimin e internetit, ankohen se cilësia e shërbimit është mjaft e dobët. Mund të qëndrosh me minuta të tëra përpara kompjuterit për të hapur një website, por problemet nuk mbarojnë këtu. Shpesh herë të rastis që ky shërbim edhe pse paguhet, të mos të ofrohet. Shoqëritë ankohen se shpesh herë u ndodh që të mos jenë të lidhura fare me linjën e internetit. Sipas burimeve nga kjo kompani, shkak për këtë shërbim të dobët janë defektet që ka linja e Telekomit me atë të Italisë. Sipas tyre, punimet për riparimin e kësaj linje kanë nisur prej më se 1 jave. Por burimet pranë kësaj shoqërie nuk japin një afat kohor se kur mund të përfundojnë punimet e nisura. Në këtë mënyrë, shoqëritë që kanë marrëveshje me Telekomin do t’u duhet të presin deri në një afat kohor për të pacaktuar se kur do t’u ofrohet shërbimi i internetit. E gjithë kjo situatë e krijuar bie ndesh me nismën më të re të qeverisë Berisha, e cila është “Shqipëria në moshën e Internetit”. Kjo deklaratë është bërë nga kreu i qeverisë, Sali Berisha në konferencën e organizuar pak kohë më parë nga grupi “The Economist”. Sipas Berishës, qeveria do t’i kushtojë rëndësi shtrirjes së teknologjisë së re të internetit në të gjithë vendin. Këtë nismë Berisha e ka prezantuar edhe gjatë një vizite me rastin e vitit të ri shkollor në shkollën “Sami Frashëri”. Berisha u premtoi studentëve se do të kenë internet jo vetëm në shkolla, por edhe në shtëpi. Sipas tij, kjo nismë do të shndërrohet në levën e Arkimedit për zhvillimin e Shqipërisë. “Kemi vendosur me një reformë të jashtëzakonshme të pajisin me portale internetin me band të gjerë, të shumëfishojnë dhjetëra e dhjetëra herë numrin e atyre që sot kanë internet, të rrisin përhapjen e internetit në Shqipëri brenda një kohe të shkurtër, më shumë se 30 herë. Për këtë ne do t’u drejtohemi teknologjive më moderne dhe teknologjive më të avancuara që gjenden në fushën e komunikimit”, - ka deklaruar Berisha. Por, pavarësisht këtyre deklaratave të qeverisë, shërbimi i internetit në Shqipëri është ende shumë i dobët.
Ndërkaq, kompania Albtelekom ka deklaruar se kanë bërë ulje çmimesh për këtë produkt. Kështu, që nga data 1 qershor, Albtelekom ka ulur tarifat e shërbimit ADSL. Janë ulur me 30 për qind tarifat e instalimit të internetit, ndërsa tarifa e pajtimit mujor është ulur me 50 për qind.