Adriano Galiani shijon fitoren në Ligën e Kampioneve të arritur ndaj Anderlehtit, falë mrekullisë së Kakasë. "Është një lojtar i madh, - tha ai, - ndoshta më i madhi apo diçka aty afër. Milani gjithnjë ka luajtur mirë nga fillimi i sezonit e deri tani, por për të fituar, duhet të kemi shumë lojtarë të fortë, jo vetëm një udhëheqës."
Adriano Galiani ka parë shumë kampionë në karrierën e tij. Milani "berluskonian" ka qenë një "kuzhinë" futbollistike, nga Barezi te Maldini, dhe nuk i ka mohuar vetes blerje të mëdha në merkato, si holandezët "tulipanë", Sheva dhe Kaka me shokë. Pikërisht brazilianin, Galiani nuk e krahason me një udhëheqës që ka marrë për dore Milanin: "Kemi pasur shumë, por as që bëhet fjalë". Fjalë të ëmbla, krahasime të kujdesshme edhe për Milanin e tij. "Kemi luajtur gjithnjë mirë, që nga fillimi i vitit e deri tani, - thotë i kënaqur zv.presidenti kuqezi, duke nënvizuar më pas rëndësinë e kolektivit. - Për të fituar dhe për të mbajtur vendin e parë në renditjen europiane, duhet pasur shumë lojtarë të mëdhenj dhe ne nuk jemi një formacion që ka vetëm një udhëheqës dhe disa lojtarë të dobët, por një skuadër me shumë lojtarë të fortë." Në fund të ndeshjes, Ançeloti nuk u drejtua në dhomat e zhveshjes. I priti lojtarët në hyrjen e tunelit dhe i përshëndeti një nga një dhe pastaj përqafoi Adriano Galianin, dukshëm i kënaqur: "Ishte shumë e rëndësishme të fitonim, - tha trajneri. - Fakti që arritëm të fitonim me dhjetë lojtarë, na jep moral dhe besim." Milani u rinis dhe Galiani shikon më pas të ardhmen: "Jam optimist për rinovimin e kontratës së Didës: shpresoj që shpejt të vijë edhe firma." Dhe në fund: "Nëse duhet të vijë Ronaldinjoja? Asnjë problem, do të ndryshojmë modul." Nëse do të ishte një gjysmë mbrëmjeje vere, do të ishte një ëndërr. Por jemi në tetor dhe i ngjan një projekti.