Një grindje banale ka përfunduar me pengmarrje, duke alarmuar policinë e kryeqytetit në orët e para të ditës së djeshme. 31-vjeçari Artur Hushta, fare pranë qendrës së Tiranës, ka rrëmbyer një 25-vjeçar nga Durrësi, për faktin e vetëm se ishte kushëri i personit me të cilin ishte rrahur disa ditë më parë. Fatmirësisht, situata është zgjidhur brenda një kohe relativisht të shkurtër nga shërbimet e Komisariatit numër 1 të Policisë së Tiranës, të cilët e kanë ndjekur mjetin tip "Volksëagen", ku ndodhej pengu dhe e kanë liruar pranë urës së Lanës në Bulevardin "Dëshmorët e Kombit". Hushta, është siguruar në ambientet e izolimit të komisariatit, dhe ndaj tij, Prokuroria e Rrethit ka nisur tashmë hetimet me akuzën "e heqjes së paligjshme të lirisë së tjetrit". Ai kishte vetëm dy muaj që ishte kthyer nga Greqia ku punonte dhe jetonte si emigrant dhe gjatë kësaj kohe ishte grindur me djalin e tezes së 25-vjeçarit durrsak.