Dekreti i presidentit për mosshkarkimin e kryeprokurorit është i padiskutueshëm nga institucionet e tjera.

Ky është qëndrimi më i fundit i vetë kreut të shtetit, Alfred Moisiu, pas reagimeve të ashpra të bëra nga ana e kryeministrit të vendit, Sali Berisha dhe kryeparlamentares, Jozefina Topalli, si dhe nga një pjesë e deputetëve të maxhorancës që kundërshtojnë mosshkarkimin e kryeprokurorit Sollaku. Presidenti i ka qëndruar qëndrimeve se ka vepruar në përputhje me Kushtetutën dhe me ligjet në fuqi. “Sigurisht unë njoh Kushtetutën e Shqipërisë dhe ajo e ka të shkruar si të zezën mbi të bardhë se si bëhet kjo punë. Dhe unë veprova ashtu siç është shkruar në Kushtetutë. Se ç’kanë thënë, unë nuk di gjë, tani po e dëgjoj nga ju, por nuk mendoj se ka rrugë tjetër, përveç Kushtetutës. Sepse në një shtet të së drejtës veprohet vetëm me Kushtetutë dhe me ligje. Këshillat, mendimet, komentet janë të tjera gjëra”, deklaroi presidenti për median. Moisiu ka hedhur poshtë qëndrimet e maxhorancës dhe të përfaqësuesve të saj se dekreti i tij do të shkaktojë ngërç institucional, apo përplasje dhe mosfunksionim mes tyre. “Unë mendoj se nuk ka pse të ketë ngërç institucional, sepse në radhë të parë ne veprojmë sipas Kushtetutës dhe ligjit dhe vendimi dhe dekreti i Presidentit të Republikës është i padiskutueshëm”, deklaroi Moisiu. Kreu i shtetit ka dhënë kështu dhe një ide të tij në lidhje me lëvizjen e mundshme të maxhorancës për të hetuar me prokurorë të pavarur prokurorin e Përgjithshëm. Dy ditë më parë, kryeministri Berisha i kërkoi ministrit të Drejtësisë, Aldo Bumçi, që të niste një hetim të pavarur ndaj kryeprokurorit. “Parlamenti duhet të shqyrtojë së bashku me Ministrinë e Drejtësisë mundësinë për ngritjen e një grupi hetimor ndaj kryeprokurorit, i cili, nëse ka imunitet, të mund të shihet heqja e imunitetit dhe hetimi i të gjitha lidhjeve të tij me krimin, favorizimet që u ka bërë organizatave kryesore kriminale dhe shumë probleme të tjera të mëdha. Një grup hetimor i pavarur do të hetonte lidhjet e tij me krimin dhe jo si zotohet Sollaku, që do të hetojë veten e tij. Por, edhe një herë dua ta garantoj se fundi i tij do të jetë fundi që kanë pasur dhe protektorët e tij”, deklaroi Berisha.

Patozi: Presidenti goditi sovranitetin parlamentar

Presidenti ka kompromentuar rëndë pozicionin e tij në lidhje me rastin “Sollaku”. Ish-kryetari i komisionit të posaçëm Hetimor ndaj kryeprokurorit, deputeti i PD-së, Astrit Patozi, ka mbajtur këtë qëndrim në lidhje me dekretin e fundit të kreut të shtetit për mosshkarkimin e prokurorit të Përgjithshëm, Theodhori Sollaku. “Vendimi e kompromenton shumë rëndë pozicionin e tij, duke e bërë atë automatikisht palë me atë që ka shkelur në mënyrë flagrante ligjin. Për fat të keq, arsyetimi i kreut të shtetit është i stisur dhe manipulativ, që jo vetëm tenton të eliminojë rezultatin e një pune shumë të përgjegjshme ligjore të komisionit parlamentar, por përpiqet të legjitimojë dhe fshehë disa nga shkeljet më monstruoze që i janë bërë ligjit nga një funksionar publik”, deklaroi Patozi. Sipas tij,”Presidenti, me vendimin e tij, për të mbajtur në këmbë modelin e bashkëpunimit të shtetit me krimin që përfaqëson Sollaku, ka goditur rëndë parimin e sovranitetit parlamentar, themelin e shtetit ligjor për çdo republikë parlamentare si kjo e jona”.

Deputeti i PD-së e cilëson si joligjor hetimin e ri të maxhorancës për Sollakun
Ngjela: Presidenti mbrojti shtetin nga tirania

Deputeti i PD-së, Spartak Ngjela, ka cilësuar jo ligjore nismën e maxhorancës për të hetuar me prokurorë të pavarur punën e deritanishme të kryeprokurorit, Theodhori Sollaku. Sipas tij, Kushtetuta nuk e parashikon hetimin e pavarur. “Hetimi në Shqipëri është ekskluzivitet i Prokurorisë. Ne nuk kemi akoma një bazë ligjore që të kemi prokurorë të pavarur. Kemi avokatë privatë, por nuk kemi prokurorë privatë. Ka Amerika prokurorë privatë, që e kanë çuar presidentin e SHBA-së në Gjykata Kushtetuese. Në Shqipëri nuk ka, unë e kam kërkuar të ketë, do të ketë apo jo në të ardhmen, është problem tjetër. Kushtetuta njeh vetëm një institucion akuze dhe kjo është Prokuroria”, deklaroi Ngjela për mediat. Sipas tij, Kushtetuta nuk e ka këtë variant që kërkon maxhoranca për të hetuar Sollakun. Avokati i njohur e ka vlerësuar dhe një herë vendimin e presidentit për mospranimin e propozimit të maxhorancës parlamentare për të shkarkuar Sollakun nga posti i kryeprokurorit. “Me vendimin për të mos shkarkuar Sollakun, Presidenti i Republikës mbrojti shtetin. Shteti shpëtoi nga orekset për të marrë të gjitha institucionet në dorë. Ky është rasti i parë historik kur tirania sprapset në Shqipëri dhe nuk i merr të gjitha institucionet dhe institucioni i presidentit tregoi që është garant kushtetues”, deklaroi Ngjela.