Ministri i Ekonomisë, Genc Ruli, prezantoi në Konferencën “Reduktimi i ekonomisë informale-sfidë e qeverisë shqiptare”, hapat që Ministria e Ekonomisë, Tregtisë dhe Energjetikës ka ndërmarrë, të cilat do të ndikojnë në reduktimin e ekonomisë informale. “Qeveria shqiptare nëpërmjet projektit regjistrimi i biznesit në një dritare të vetme, kërkon të kthehet në një shembull në këtë sektor. Ne do të reduktojmë në një ditë regjistrimin e biznesit, duke ofruar një incentiv të rëndësishëm për reduktimin e sektorit informal në ekonomi”, theksoi Ruli. Masë e rëndësishme është ndërmarrë nga Ministria e Financave, lidhur me analizën e nivelit të barrës fiskale, duke disponuar të gjitha të dhënat e nevojshme. Por Ruli vlerësoi edhe krijimin e një zyre shërbimi “online” dhe “nonstop” për deklarimin e shkeljeve, e cila funksionon pranë Drejtorisë së Përgjithshme të Tatimeve, në sektorin e shërbimit të taksapaguesve. Gjithashtu, evidentimi i numrit të të punësuarve në fushën e ndërtimit dhe i pagave faktike mbi të cilat janë siguruar punëmarrësit, sipas Rulit, është një nga masat e rëndësishme që merren nga strukturat përgjegjëse.

Ja faktorët që ndikojnë në informalitet
Korrupsioni, niveli i lartë i taksave, si dhe burokracitë në administratë janë faktorët që ndikojnë në nivelin e lartë të informalitetit në vendin tonë. Ministri i Financave, Ridvan Bode, ka deklaruar se faktorë të tjerë që nxisin rritjen e pjesës informale të ekonomisë sonë dhe lehtësojnë ushtrimin e saj kanë të bëjnë me aspektet strukturore të ekonomisë sonë. Sipas Bodes, ekzistenca e një ekonomie familjare dominante dhe bizneseve të vogla në mbi 90 për qind të tyre, si dhe mungesa e përcaktimit të qartë të së drejtës së pronës për një kohë të gjatë, janë dy faktorë kryesorë që ndikojnë në shkallën e informalitetit. “Mungesa e një standardi që identifikon qytetarët në mënyrë përfundimtare, ul mundësitë e aktiviteteve me identitete të rreme, apo transferim të bizneseve në emra të tjerë, të cilët më parë kanë pasur rekorde të këqija të sjelljes ligjore”, ka theksuar Bode. Sipas kreut të Financave, për shkak të veprimit njëherazi dhe me intensitet të njërit, apo të gjithë faktorëve të mësipërm, niveli i ekonomisë informale në vendin tonë është më i përhapuri në rajon dhe me një tendencë në rritje.

 

punesimi
Evidentimi i numrit të të punësuarve në fushën e ndërtimit dhe i pagave faktike mbi të cilat janë siguruar punëmarrësit, është një ndër masat e rëndësishme që do të merren nga strukturat përgjegjëse. Nga Inspektorati Shtetëror i Punës, në fushën e ndërtimit nëpërmjet një aksioni të përbashkët me Drejtorinë e Përgjithshme të Tatimeve, nga disa shifra operative rezulton se janë kontrolluar rreth 671 subjekte me aktivitet ndërtim dhe prodhim materiale ndërtimi.

kreditimi
Vrojtimet edhe për vendin tonë tregojnë se ka një korelacion të plotë mes rritjes së ekonomisë informale dhe pamjaftueshmërisë së të ardhurave publike e rritjes së taksave. Përballë nivelit të lartë të taksave dhe nivelit më të ulët të rendimentit fiskal, vendi ynë ka qenë unikal në nivelin e ulët të kreditimit të ekonomisë me vetëm 7% të PBB (Kroacia 55% e PBB, më pak Maqedonia me 25% të PBB).

regjistrimit
Sipas ministrit të Financave, numri i bizneseve të regjistruara është rritur me 20 mijë dhe i të punësuarve nën skemën e sigurimeve shoqërore me 40 mijë. “Rezultatet e para janë vetëm një inkurajim. Dominimi i plotë i fenomenit mbetet një sfidë për qeverinë, prandaj duhet një program adekuat dhe i koordinuar”, ka deklaruar ministri Bode në konferencën e djeshme