Kryeministri i Shqipërisë të japë sqarime për akuzat që ka bërë dhe faktet që zotëron kundër personave publikë, presidentit apo kryepro-kurorit të vendit.

Në një takim pune me prokurorët e rretheve, Apelit dhe Krimeve të Rënda, shefi i akuzës Theodhori Sollaku tha se Prokuroria e Krimeve të Rënda duhet të thërrasë kryeministrin Berisha dhe ta pyesë atë për akuzat që ka bërë. “Deri tani politikanët janë trajtuar si persona me imunitet që mund të flasin dhe bëjnë çfarë të duan, por tani ka ardhur koha që kush ka fakte, të shkojë në Prokurori dhe të denoncojë”, ka pohuar Sollaku. Ai tha se e fton kreun e qeverisë, Berisha, të paraqitet në Prokurori dhe të depozitojë fakte që implikojnë personat publikë dhe më pas organi i akuzës do të veprojë sipas Kushtetutës dhe ligjit. Sipas Sollakut, kryeministri Berisha mund të paraqitet në Prokurorinë e Krimeve të Rënda dhe të japë sqarime, pasi vazhdimisht e ka vlerësuar dhe ka besuar në këtë Prokurori. “Pasi Berisha të thirret dhe të japë sqarime, të thirret nga ju prokurori i Përgjithshëm edhe presidenti gjithashtu”, iu drejtua Sollaku kryeprokurorit të Krimeve të Rënda.

Akuzat
“Prokuroria nuk mund të tolerojë një situatë ku politikanët akuzojnë publikisht, duke implikuar e shantazhuar njëri-tjetrin. Ka pasur akuza në adresë të institucioneve të pavarura dhe në rastin tim akuzat kanë qenë të rënda. Mendoj se indiferentizmi i Prokurorisë në këto raste ka bërë punën e vet”, tha shefi i akuzës. Në vijim të fjalës së tij në takim me prokurorët e të gjithë vendit, Sollaku i falënderoi ata që në punën e tyre nuk janë ndikuar nga situata politike e krijuar në vend. Një takim të tillë me vartësit, Sollaku e zhvilloi në fillim të punës së komisionit Hetimor për shkarkimin e tij. Ai u kërkoi atëherë vartësve që të vazhdonin luftën kundër krimit, pa ndikim nga procedura e Parlamentit. Sollaku, si falënderoi presidentin për vendimin e mosshkarkimit, u tha vartësve të tij, se vendimi ligjor i kreut të shtetit është një inkurajim për Prokurorinë. Sollaku e cilësoi normale procedurën e shkarkimit të një prokurori të përgjithshëm në një shtet demokratik, si një praktikë normale që mund të ndiqet në çdo vend. “Procedura që u ndoq në Shqipëri në rastin tim, është anormale”, vijoi prokurori i Përgjithshëm. Ai tha se vendimin e presidentit Moisiu nuk e shikon si një moment triumfi, por si një moment reflektimi dhe mësimi për atë dhe vartësit e tij në Prokurori.

Hetimet
Ngritja e akuzës kur një person ka shkelur ligjin, qoftë edhe në rastin e shpifjeve dhe denigrimit, ishte një porosi që Sollaku u la vartësve të tij në takimin e djeshëm. “Vë re që diku ka ngurrime për të marre vendime nga prokurorët. Ju duhet të jeni krenarë për të marre vendimet e duhura bazuar te Kushtetuta, por të drejtat Kushtetuta ua jep juve dhe mos u ndikoni nga faktorë të jashtëm. Asnjë të mos hezitojë nga vendimmarrja, pavarësisht nga ente përcaktuese si policia apo persona të interesuar. Përsa kohë do jem kryeprokuror, unë do t’ju mbroj në këtë vendimmarrje. Por nga ana tjetër, theksoj se kryeprokurori nuk do t’ju ndihmojë në rast se vendimmarrja do të jetë nga interferencat politike, nga personat e interesuar, për këtë do ndëshkoheni”, tha Sollaku. Ai theksoi se organet e Prokurorisë në të gjithë vendin duhet t’i kushtojnë rëndësi rritjes së bashkëpunimit me policinë.

POROSITE E SOLLAKUT PER VARTESIT

• Të thirret për të dhënë sqarime për të gjitha faktet që di ndaj personave publikë, kryeministri Sali Berisha, më pas presidenti dhe prokurori i Përgjithshëm
  
• Të rritet bashkëpunimi me policinë dhe drejtuesit e saj lokalë dhe në qendër
  
• Prokurorët të marrin vendime pa u ndikuar nga entet kallëzuese si policia apo organet e tjera, që paraqesin denoncime në Prokurori
  
• Të respektohen garancitë proceduriale që pjesëmarrësit në proces gëzojnë nga Kushtetuta dhe Kodi i Procedurës Penale

Byroja e opozitës vendosi nisjen e tij nga LSI-PSD

Opozita: Mocion mosbesimi për Topallin
Pas reagimit ndaj Moisiut dhe bllokimit të hetimit për Berishën

Lëvizja Socialiste për Integrim dhe Partia Socialdemokrate kanë ndërmarrë nismën në emër të partive opozitare për mocion mosbesimi për kryetaren e Kuvendit, Jozefina Topalli. Vendimi është marrë gjatë mbledhjes së Byrosë Opozitare të krerëve të grupeve, kur Majko, Gjinushi dhe Brokaj kanë vendosur që dy partitë më të mëdha të koalicionit opozitar, pas PS-së, LSI-PSD të marrin nismën për mocionin. Por mbledhja e Byrosë Parlamentare të opozitës ka lënë jashtë krerët e dy partive të tjera përbërëse të saj, Paskal Milon dhe Neritan Cekën, të cilët të kontaktuar nga gazeta “Panorama” nuk kishin dijeni si për mbledhjen, ashtu dhe për vendimin e marrë në të për mocionin. Madje, Majko ka marrë kritika dhe nga sekretarja për Marrëdhëniet me Jashtë në PS, Arta Dade, dhe deputeti, Namik Dokle, për të bërë transparent në mbledhjen e grupit parlamentar socialist vendimin e marrë në tryezën e Byrosë opozitare. Deputetët e opozitës, të cilëve pritet t’u bashkohen dhe deputetët e PDK-së do të firmosin kërkesën për mocion votëbesimi ndaj Topallit. Hedhja poshtë me votim, duke shkelur rregulloren e Parlamentit, të kërkesës së opozitës për komision hetimor për pasurinë e familjes Berisha dhe emërimeve nepotike të tij, deklaratat ndaj presidentit Moisiu në emër të deputetëve të Parlamentit, ku përfshihen dhe ata të opozitës, mospërfshirja në seancë e raporteve të komisionit hetimor për shkarkimet në administratën publike dhe Albtelekomin, vendimi i kryesisë së Kuvendit për përjashtimin e mediave private nga transmetimi direkt i seancave të Kuvendit, përjashtimet nga seancat të deputetëve opozitarë me vendime të paargumentuara të Byrosë Parlamentare janë disa nga çështjet mbi të cilat mbështetet mocioni i mosbesimit ndaj kryeparlamentares Topalli. Ky është mocioni i dytë që ndërmerret ndaj Topallit, ndërkohë që mocioni i parë ndaj saj, i kërkuar nga socialistët në janar të këtij viti, u rrëzua nga votat e maxhorancës, të cilët votuan në mënyrë të hapur.

Mocioni i mosbesimit

Jo më pak se një e pesta e të gjithë deputetëve, në mbështetje të nenit 105 të Kushtetutës, mund të paraqesë mocion mosbesimi. Mocioni i mosbesimit duhet të përmbajë nënshkrimet e deputetëve dhe të jetë i arsyetuar. Me paraqitjen e mocionit të mosbesimit, kryetari i Kuvendit thërret Konferencën e Kryetarëve për të përcaktuar datën e zhvillimit të mocionit. Paraqitja e mocionit në seancë plenare bëhet jo më vonë se 7 ditë nga depozitimi i tij dhe votimi nuk mund të bëhet pa kaluar 3 ditë nga paraqitja e tij në seancë plenare. Miratimi i mocionit kërkon shumicën e thjeshtë të të gjithë anëtarëve të Kuvendit.

Ministri i Drejtësisë: I pakuptimtë vendimi i Moisiut, mjafton një dosje për kryeprokurorin

“Dy rrugët për shkarkimin e Sollakut”
Bumçi: Komision i ri Hetimor ose mund ta shpallë fajtor gjykata

Ministri i Drejtësisë, Aldo Bumçi, tha dje se ka dy rrugë për shkarkimin e prokurorit të Përgjithshëm pas vendimit të marrë nga presidenti Moisiu.

Pasi e cilësoi të pakuptimtë vendimin e kreut të shtetit, kreu i dikasterit të drejtësisë tha se maxhoranca mund të veprojë për largimin e Sollakut, duke “shmangur” presidentin. Ministri Bumçi nuk dha shumë detaje në konferencën e shtypit lidhur me rrugët që do të ndiqen për shkarkimin e Sollakut. Megjithatë i kontaktuar më vonë nga gazeta “Panorama”, Bumçi është shprehur se mund të veprohet me padi në gjykatë kundër kryepro-kurorit dhe me inspektime të punës së Prokurorisë. “Mënyra e parë për të shkarkuar Sollakun është dërgimi i grupeve të inspektimit në Prokurori për të kontrolluar punën dhe për të gjetur shkeljet dhe abuzimet. Këto shkelje dhe abuzime të zbuluara nga inspektorët të dërgohen në Parlament, ku të kërkohet ngritja e një tjetër Komisioni Hetimor Parlamentar për shkarkimin e Sollakut. Ky komision i kërkon më pas presidentit firmën e shkarkimit”, sqaroi Bumçi. Sipas tij, mënyra e dytë është padia penale ndaj kryeprokurorit Sollaku për shkelje të caktuara në detyrë. Kreu i dikasterit të drejtësisë sqaroi se nëse gjykata do ta shpallte fajtor, atëherë ai është automatikisht i shkarkuar. “Problemi në këtë rast do të ishte se Prokuroria do të hetonte kreun e saj”, tha Bumçi.

Reagimi
Aldo Bumçi doli dje në një konferencë shtypi vetëm pak kohë pasi prokurori i Përgjithshëm, Sollaku, ishte takuar me vartësit e tij dhe kishte kërkuar paraqitjen e kryeministrit në Prokurori. Ministri i Drejtësisë reagoi për vendimin e presidentit që nuk shkarkoi kryeprokurorin, duke e cilësuar vendimin e kreut të shtetit si të pakuptimtë dhe joligjor. “Vetëm kurba e lartë e kriminalitetit dhe në veçanti krimit të organizuar do të ishte shkak mëse i mjaftueshëm për reflektim të pozicionit të çdo zyrtari në shoqëri demokratike”, tha ministri duke iu referuar rastit të shkarkimit të prokurorit të Përgjithshëm në Maqedoni. Bumçi vijoi më tej duke thënë se në procesin e ngritjes dhe funksionimit të komisionit hetimor të Kuvendit dhe në propozimin e shkarkimit të prokurorit të Përgjithshëm, Ministria e Drejtësisë ka pasur një rol të veçantë. “Ministria e Drejtësisë ka informuar paraprakisht presidentin për të gjitha çështjet e trajtuara nga komisioni hetimor. Megjithatë do të mjaftonte vetëm një dosje e trajtuar në komision që Moisiu të vendoste shkarkimin”, vlerësoi ministri i Drejtësisë, Aldo Bumçi.

• varianti I
  Inspektorët e Ministrisë së Drejtësisë do të bëjnë kontroll për punën e Prokurorisë e më pas të hartojnë një raport. Ky raport dërgohet në Parlament, ku me anë të tij kërkohet ngritja e një tjetër komisioni hetimor për Sollakun.
  
• varianti II
  Varianti i dytë i parashikuar nga ministri i Drejtësisë është ngritja e një padie penale ndaj kryeprokurorit Sollaku. Kjo padi mund të bëhet në Prokurori në rast të konstatimit të shkeljeve për të cilat i kërkohet Prokurorisë të bëjë hetime.
  
• Kallezimet e KLSH
  Duke iu referuar inspektimeve dhe kontrolleve të bëra më parë në Prokurori, ministri Bumçi tha se institucioni i akuzës nuk ka marrë në konsideratë kallëzimet e bëra nga KLSH. Këto kallëzime, sipas Bumçit, kanë pasur për objekt abuzimet me fondet publike të zyrtarëve të lartë.
  
• kontrolli
  Ministri Bumçi tha dje se brenda Drejtorisë së Inspektimit në Ministrinë e Drejtësisë ndodhet një strukturë me ish-punonjës të Prokurorisë. Ata, sipas ministrit, do të bëjnë disa kontrolle në prokuroritë e vendit për të hetuar abuzimet e pretenduara të Sollakut.
  
• sollaku
  Në takimin me prokurorët e të gjithë vendit, shefi i akuzës shqiptare tha se edhe drejtues të tjerë të institucioneve të pavarura në vend, duhet të përgatiten pasi mund të sulmohen nga kryeministri Berisha.

Kryeministri i kërkon Bumçit kontrolle ndaj Sollakut
Berisha: Hetim nga prokurorë të pavarur për kryeprokurorin

Kryeministri, Sali Berisha, edhe pse ka deklaruar se do ta pranojë vendimin e presidentit, në të njëjtën kohë ka vazhduar të shigjetojë kryeprokurorin Sollaku. “Parlamenti duhet të shqyrtojë së bashku me Ministrinë e Drejtësisë mundësinë për ngritjen e një grupi hetimor ndaj kryeprokurorit, i cili, nëse ka imunitet, të mund të shihet heqja e imunitetit dhe hetimi i të gjitha lidhjeve të tij me krimin, favorizimet që u ka bërë organizatave kryesore kriminale dhe shumë probleme të tjera të mëdha”, deklaroi Berisha në mbledhjen e grupit parlamentar të PD-së. Ai theksoi se “ndonëse Sollaku mbeti në krye të Prokurorisë së Përgjithshme, lufta kundër krimit të organizuar do të vazhdojë e pandërprerë. Kryepro-kurori ka qenë pjesë e krimit, pjesë e Aldo Bareve etj”. “Një grup hetimor i pavarur do të hetonte lidhjet e tij me krimin dhe jo si zotohet Sollaku që do të hetojë veten e tij. Por, edhe një herë dua ta garantoj se fundi i tij do të jetë fundi që kanë pasur dhe protektorët e tij”, tha Berisha. Për dekretin e Moisiut, kreu i PD-së, Berisha, tha se “kushtetutshmëria e vendit është një kusht për respektimin e kushtetutshmërisë, e cila është obligim i një rendi demokratik”. “Mendoj se duhet intensifikuar lufta kundër krimit dhe korrupsionit, duke bllokuar të gjitha përpjekjet e kryeprokurorit për ta bllokuar këtë luftë”, tha më tej Berisha. Kryeministri akuzoi kryepro-kurorin për mbyllje të dosjeve, si ajo për çështjen e ish-ministrave socialistë, Anastas Angjeli dhe Igli Toska. “Balozët po këndojnë, por i siguroj se do të jenë të dëshpëruar në këngën e tyre, pasi ne kemi mandatin për rivendosjen e shtetit ligjor dhe ne do t’i qëndrojmë me vendosmëri më të madhe këtij angazhimi”, theksoi kryeministri.