Adriano ende është në shterpësi, Ibrahimoviçi ka ndaluar vetëm te goli ndaj Fiorentinës në javën e parë, Kruzi e Rekoba sapo janë rikthyer nga dëmtimet dhe Krespoja është i dëmtuar: kështu është Dejan Stankoviç, njeriu-gol i Interit në këtë fillim sezoni. Serbi ka shënuar deri tani tre gola (një ndaj Kievos dhe dy me Katanian) dhe vetëm Krespoja ka shënuar të njëjtin numër golash. "Rëndësi ka fitorja", - thotë serbi.
Në 12 gola të shënuar gjithsej nga skuadra zikaltër, vetëm katër vijnë nga sulmi: tre të nënshkruar nga Hernan Krespo dhe një i shënuar nga Zllatan Ibrahimoviç. Kësisoj, një falënderim i madh shkon për mesfushorët nëse Interi është i vetëm në krye të renditjes dhe në veçanti për Dejan Stankoviçin, autor i tre golave, të gjithë vendimtarë. Sigurisht, goli i shënuar ndaj Kievos e çoi rezultatin në 3-0, por në bazë të rezultatit final 4-3, edhe ai i shënuar nga serbi, ishte vendimtar. Vetë numri 5 zikaltër minimizon dhe mendon për tri pikët e fituara dje ndaj Katanias: "Jam i kënaqur për golat dhe paraqitjen time, duhet të vazhdojmë kështu, sepse na presin shumë ndeshje të tjera. Rëndësi ka që rigjetëm fitoren, pasi vuajtëm shumë. Shokët e mi punuan shumë gjatë pushimit të kombëtareve dhe ne që luajtëm me përfaqësueset, nuk pushuam fare. Në pritje që edhe sulmuesit të zhbllokohen dhe t'u dhurojnë kënaqësi tifozëve dhe padronit Morati, tani serbi shpreson të zhbllokohet edhe në Europë, ku skuadra e Mançinit duhet të fitojë patjetër të mërkurën ndaj Spartakut të Moskës, pas humbjeve me Sportingun dhe Bajernin e Mynihut, që e shndërruan në "malore" ecurinë në Champions. "Duhet të jemi të ndërgjegjshëm se mund të fitojmë gjithnjë me cilësitë e mëdha që zotërojmë."
Falë Zotit, mirë që ka menduar Stankoviçi: sepse Interi i pjesës së parë ishte për t'u "flakur" tej. I befasuar ende pa u vendosur në fushë nga eurogoli i Maskarës, Mançini e mori përgjigjen pozitive në pjesën e dytë. "E filluam mjaft mirë, pastaj, pas atij goli të çuditshëm, luajtëm dobët, - shpjegon trajneri zikaltër. - Portieri u mashtrua nga dielli dhe pastaj skuadra u çorientua disi, sepse të gjithë donin të jepnin ndihmën e tyre, por duhet të qëndrojmë të bashkuar dhe të disiplinuar gjithnjë, pa e humbur toruan."
"Katania u mbyll mirë, - vazhdoi Mançini, - duke gjetur kundërsulme të shpejta. Në pjesën e dytë e rigjetëm veten, filluam të krijonim hapësira dhe skuadra luajti mirë. Në fund, më duket një sukses plotësisht i merituar."
Tri pikë të vështira që gjithsesi nuk arrijnë të fshehin dy probleme që Mançini do t'u përgjigjet shumë shpejt: paraqitja e disatë zhgënjyese e Adrianos dhe një mbrojtje disi "balerinë". "Për Adrianon nuk përgjigjem, sepse u mërzita duke përsëritur të njëjtat gjëra", - ia preu shkurt tekniku, që më pas pranoi ekzistencën e një problemi në mbrojtje: "Pësojmë shumë gola dhe në çdo ndeshje vazhdojmë të pësojmë nga një, edhe pse ai i djeshmi ishte thuajse rastësor. Sigurisht, duhet të përpiqemi të pësojmë më pak", - e mbylli Mançini.