Sampdoria Milan 1 1
Shënues: Bonacoli 69'/ Kalaxe 84'
Sampdoria: Kastelaci, K.Zenoni, Sala, Falkone, Pieri, Xh.Delvekio, Volpi, Palombo, Françeskini, Kualjarela, Bonacoli. Tr: Novelino.
Milan: Dida, Kafu, Nesta, Maldini, Jankulovski (Kalaxe 69'), Gatuzo, Broki, Sedorf, Kakà, Inzagi, Xhilardino (Oliveira 65'). Tr: Ançeloti.
Gjyqtar: Rozeti.
Kartonë të verdhë: Jankulovski, K.Zenoni, Bonera, Xh.Delvekio, Kakà.



Duket se diçka nuk shkon, pasi të mos arrish të fitosh një ndeshje brenda një muaji, sigurisht që do të provokonte rënien e "këmbanave të alarmit". Faza përgatitore e nxituar, lodhja e lojtarëve në disa ndeshje brenda pak ditësh, por edhe mungesa e një sulmuesi goli, nuk janë pak për të t'u shqetësuar. Milani arrin të marrë dje me vuajtje një barazim 1-1 në "Marasi" kundër Sampdorias. Janë blukaltrit që kalojnë në epërsi në minutën e 69-të me një goditje me kokë në zonë të Bonacolit. Barazimi i kuqezinjve vjen në minutën e 84-t, falë një goli të Kalaxes. Në pjesën e parë, gjyqtari Rozeti nuk reagon pas një ndërhyrjeje të gabuar në zonë ndaj Inzagit.
Milani rigjen rrugën e golit, por jo atë të fitores, që mungon tashmë prej katër javësh. Pas pushimit të kombëtares, skuadra e Ançelotit e ka rifilluar saktësisht aty ku ishte ndaluar. Shumë raste të krijuara për gol, thuajse asnjë të lejuar kundërshtarit, por një paaftësi e pabesueshme për të shndërruar në gol punën e lojës së prodhuar. Dhe kështu, pasi në pjesën e parë Xhilardino e Inzagi, gjithsesi më i lëvizshmi e i rrezikshmi nga milanistët, kishin harxhuar shumë energji, në pjesën e dytë, mbërrin dhe "shuplaka" e Sampdorias. Një kros i shkëlqyer nga e majta i Pierit, Nesta e Maldini "harrojnë" Bonacolin, që me kokë shënon bukur ndaj Didës.
Në minutën e 69-të Ançeloti merr masa. Oliveira zëvendëson një Xhilardino të humbur fare, del jashtë edhe Kafu e Jankulovski, që i lënë hapësirë Bonerës e Kalaxes. Dhe pikërisht gjeorgjiani në minutën e 84-t, gjen golin dhe u shmang kuqezinjve një humbje të pamerituar. Krosim nga mesfusha i Brokit, Delvekio tregohet i pavëmendshëm dhe Kalaxe dy hapa larg portierit Kastelaci barazon. Por barazimi i Milanit, provokon protestat e gjenovezëve. Protesta të justifikueshme, sepse Kalaxe e kishte kontrolluar topin me një krah para se të shënonte. Në minutat e fundit nuk ndodh më asgjë dhe Milani merr në shtëpi një pikë të rëndësishme, edhe pse rrezikon shumë të humbasë fillin me skuadrat e kreut. Për Sampin, barazimi mjaftoi, sepse të marrësh pikë kundër "Djallit", është sikur të kesh fituar.

Ançeloti: Sulmuesit nuk shërbehen me topa
Karlo Ançeloti duket i kënaqur pas barazimit me Sampdorian: "Kemi luajtur më mirë në krahasim me ndeshjet e tjera këtu në Gjenovë, - tha trajneri kuqezi, - ishim pak të lodhur për shkak të përkushtimeve të lojtarëve me kombëtaret. Problemi ynë, tani është furnizimi me topa drejt sulmuesve. Duhet të rigjejmë shpejtësinë e duhur. E përsëris, shpejtësia është një difekt i yni. Sulmuesit lëvizën mirë, por duhet që të shërbehen në kohën e duhur me topa. Megjithatë po përmirësohemi, të mos harrojmë se vitin e shkuar ndaj Sampit në "Marasi" humbëm, ndaj ky barazim s'është keq." Një nga notat pozitive të ndeshjes, është rikthimi te goli për kuqezinjtë: "Por ndeshja vlen sa barazimet 0-0 të javëve të fundit, - vazhdon Ançeloti. - Ne donim të fitonim, por lodhemi ndaj skuadrave që mbyllen në mbrojtje. Nuk na lënë hapësira dhe nisen në kundërsulm. Goli u shënua nga një mbrojtës dhe jo nga një sulmues? Herët a vonë do të shënojë edhe sulmi. Ndërhyrja ndaj Inzagit? Mendoj se ishte një 11-metërsh."