TIRANE

Policia, në bashkëpunim me Prokurorinë e Krimeve të Rënda, kanë goditur një rrjet të trafikut të armëve dhe municioneve nga Shqipëria në drejtim të vendit fqinj, Greqisë. Operacioni i koduar “Kokrra e Ullirit”, ka vënë në pranga mbrëmjen e së shtunës gjashtë persona, mes të cilëve edhe një shtetas grek. Janë sekuestruar tri armë automatike kallashnikov, të gjetura në tapicerinë e dyerve të autoveturës tip “Citroen”, me traga greke, ndërkohë që në banesat e të ndaluarve janë gjetur mijëra fishekë, 10.880 euro, 4 autovetura dhe 7 celularë. Gjatë operacionit është vënë në pranga edhe një punonjës i policisë së Fierit, i cili dje është lënë sërish i lirë për mungesë provash në implikimin e tij në këtë rrjet. Arrestimet janë kryer në afërsi të qytetit të Elbasanit, në aksin nacional Tiranë-Elbasan. Personat e prangosur janë; Jorgos Kosmidhis, lindur e banues në Selanik, Greqi, Lefter Meçaj, banues në Korçë, Bledar Tako banues në Sheq të Vogël Fier, Alfred Pallashi banues në Korçë, Dashnor Merdani banues në fshatin Zerec, Korçë, Bujar Cenolli banues në Maliq Korçë. Në pranga, mbrëmjen e së shtunës ra edhe punonjësi i policisë së Fierit, Leonard Brahimi, i cili dje është lënë sërish i lirë.
Zbulimi
Prokuroria e Krimeve të Rënda, në bashkëpunim me drejtorinë e luftës kundër krimit të organizuar në Ministrinë e Brendshme, prej kohësh kishin rënë në gjurmë të këtij rrjeti, i cili dyshohet se ka pasur një veprimtari aktive në trafikun e armëve drejt Greqisë. Informacionet e mbledhura nëpërmjet përgjimeve telefonike, veprimeve stimuluese dhe agjentëve në terren, krijuan bindjen se rrjeti në fjalë po përgatitej për të realizuar trafikimin e një tjetër porosie për armë automatike, ku personi i interesuar ishte shtetasi grek Kosmidhis. Lëvizjet e tyre si dhe bisedat telefonike, janë mbajtur nën vëzhgimin dhe përgjimin e vazhdueshëm të agjentëve, deri në momentin e startimit të operacionit.
Operacioni
Aksioni policor “Kokrra e Ullirit”, është zhvilluar njëkohësisht në katër qytete; Tiranë, Elbasan, Korçë dhe Fier. Vëmendja e drejtuesve të operacionit ishte përqendruar në aksin Tiranë-Elbasan, ku është ndaluar autovetura “Citroen” me targa greke HPI 3012, në pronësi të shtetasit grek Jorgos Kosmidhis, ku në pjesët e brendshme të tapicerive të dyerve, u gjetën tre automatikë kallashnikovë. Ndërkohë, në qytetet e tjera, pothuajse në të njëjtën kohë janë realizuar arrestimet e tjera si dhe kontrollet e banesave të personave të arrestuar.

Municionet

1020 fishekë mitralozi të lehtë
170 fishekë pistolete model 56
447 fishekë automatiku model 56
46 fishekë pistolete TT
44 karikatore kallashnikovi
37 krehër pushke
14 shtrate shuli automatiku
7 shule automatiku
5 mbulesa gypi gazi automatiku model 56
7 mbulesa shtrati shuli automatiku model 56
9 gypa gazi automatik model 56
10.880 euro