Çelsi do të udhëtojë në stadiumin ku Mançesteri nuk arriti të marrë tri pikët. Kampionët e Anglisë do të kërkojnë të marrin maksimumin në ndeshjen ndaj Ridingut. "Mbretërorët" luajnë sezonin e parë në Premier Ligë dhe kanë arritur dy fitore dhe një barazim me Mançester Junajtid në tri ndeshjet në fushën e tyre në "Madejski Stadium". Tashmë skuadra e Stiv Kembëllit do të ketë testin më të vështirë ndaj Çelsit, i cili vëmendjen më të madhe e ka përqendruar në ndeshjen ndaj Barcelonës në Ligën e Kampioneve. Edhe për një ndeshje tjetër, Çelsi nuk do të ketë shërbimin e Mikael Balakut, i cili do të përmbushë dënimin prej tri ndeshjesh për një ndërhyrje të rëndë. Trajneri Hose Mourinjo mendohet se do të lërë pushim një ose dy lojtarë të rëndësishëm për ndeshjen ndaj Barcelonës. Të gjithë trajnerët e skuadrave që marrin pjesë në disa kompeticione njëkohësisht, po e vënë në përdorim sistemin e rotacionit. Ata dëshirojnë të fitojnë ndeshjet e kampionateve vendëse, por në të njëjtën kohë lojtarët më të rëndësishëm nuk i aktivizojnë për t'u lënë vend të tjerëve, duke marrë parasysh edhe ndeshjet ndërkombëtare të fazës paraeliminatore. Mesfushori i Anglisë dhe i Çelsit, Xho Kol, më në fund mund të rikthehet pas një dëmtimi në gju, i cili e mbajti jashtë për të gjithë sezonin. Mançesteri që është mbi Çelsin në tabelën e renditjes në sajë të golaverazhit, do të udhëtojë drejt fushës së Uiganit që po përpiqet të përsërisë prezantimin e vjetshëm impresionues në Premier Ligë. Dyshja e sulmit, Emile Heski - Henri Kamara, është në përpjekje të gjetjes së formës së mirë, duke marrë parasysh që skuadra nuk ka arritur asnjë fitore që nga gushti. Nga ana tjetër, Mançesteri duket se e ka rimarrë veten pas barazimit me Ridingun dhe pas humbjes që i shkaktoi Arsenali në "Old Traford", duke mundur 2-0 Njukasëllin me dy gola të norvegjezit Ole Gunar Solskjaer. Ata nuk duhet kurrsesi të gabojnë ndaj Uiganit, nëse dëshirojnë që në këtë sezon të jenë në hapat e Çelsit. Portieri Edvin van der Sar kujton sezonin e kaluar. "Vitin e kaluar humbëm disa ndeshje kundër skuadrave të vogla. Duhet të sigurohemi që kjo nuk do të ndodhë aq shpesh", - tha ai për "sajtin" e klubit. Liverpuli i mesit të tabelës do të ndeshet në fushën e tij me Blekbërnin dhe nuk do të ketë në dispozicion sulmuesin holandez Dirk Kuijt, i cili është i dëmtuar. Po kaq problematik për portierin Rafael Benitez kanë qenë gabimet e portierit Hose Reina. Arsenali i vendit të tetë me një ndeshje më pak se udhëheqësit e kampionatit, e nisën mjaft keq sezonin e ri, gjithsesi ka fituar pesë ndeshjet e fundit në të gjitha kompeticionet. "Topçinjtë" do të përpiqen të fitojnë ndeshjen e gjashtë ndaj Uotfordit. Të dytët nga fundi, pasi janë rikthyer në Premier Ligë, do të përballen me Arsenalin në rikthimin e tyre. Skuadra e Vengerit ka shënuar 10 gola dhe ka pësuar vetëm dy në pesë ndeshjet e fundit.