Lëkundet modeli i çiftit tradicional. Një grua e afirmuar mund të preferojë një burrë më të ri se vetja. Ky është një nga modelet më të reja të çifteve, ku gruaja duke qenë më e madhe në moshë, është njëkohësisht dhe ajo që “drejton”. Sipas psikologëve, këto çifte ku “ligjin e bëjnë gratë” bashkohen në një pikë: ambicia sociale e burrave është më e vogël se ajo e bashkëshorteve që kanë zgjedhur. Shfaqja e këtij tipi të ri marrëdhënieje duket se është e lidhur me emancipimin e gruas. Suksesi në punë tashmë është i gjithëpranuar, sepse ato janë të afta të ngjisin me shpejtësi shkallët e karrierës dhe mundësitë gjithnjë e më të mëdha iu kanë dhënë grave një pushtet që nuk e kishin më parë. Megjithatë përmasat e një dukurie të tillë akoma nuk dihen mirë, por duket qartë që dita-ditës po afirmohet një model i ri femëror, i cili ngjan shumë me modelin e perëndeshave, nëna të qytetërimeve të vjetra. Dihet tashmë se rreth viteve 6000 para Jezu Krishtit pothuajse në të gjithë planetin tonë kanë ekzistuar qytetërime të perëndeshave Nëna, gjurmë të të cilave i gjejmë në formën e statujave, apo legjendave (Dimitra, Afërdita etj), të cilat ishin perëndesha dhe kishin djem dashnorë mjaft të rinj, të cilët u bindeshin për gjithçka. “Deri tani nuk kam takuar asnjë grua të martuar me një burrë më të ri, që të mos jetë e afirmuar si në jetën profesionale e sociale, ashtu edhe atë shpirtërore”, ka pohuar psikologu i njohur, Uilli Pasini. Dhe shpesh ndodh që partneri i tyre të karakterizohet nga një personalitet shumë femëror. Ato kujdesen më tepër për pamjen e tyre të jashtme dhe bëjnë pak ose aspak për afirmimin e tyre social dhe profesional. Përveç kësaj shfaqet edhe një tipar i ri i identitetit mashkullor. Ato nuk mbështeten si më parë në flakjen e disa tipareve të konsideruara si femërore. Më parë një burri nuk i faleshin emotiviteti, dobësia, apo moskokëçarja. Sot këto aspekte janë të gjithëpranuara. Por a nuk është shpesh e vështirë për bashkëshortët të mbrojnë zgjedhjet e tyre në sytë e moralit social? Kjo vështirësi del më shumë në pah kur diferencën e moshës e tregon shumë edhe pamja fizike dhe në këtë mënyrë nuk mund të kalojë pa u vënë re.
Ndërsa për sa i përket anës ekonomike, kur burri fiton më pak para se gruaja, ai shihet edhe si një budalla para të tjerëve. Kjo është edhe arsyeja, që në përgjithësi këto çifte jetojnë të veçuar nga rrethi shoqëror. Në fakt, kur këto çifte vendosin të martohen, kjo është dëshira e tyre dhe shpesh nuk merren parasysh mendimet e familjeve. Një gjë e tillë nuk mund të kalojë pa probleme, sidomos për familjen e burrit. Këto çifte mbyllen në guaskën e tyre dhe preukupimi kryesor u bëhet “lehtësimi i plagëve të njëri-tjetrit”.

Arsyet pse më tërheqin burrat më të rinj janë thjesht seksuale
Silva, 35 vjeç, e dashuruar me Nikon 27 vjeç

“Jam me Nikon që prej katër vjetësh, por burrat më të rinj se vetja më kanë tërhequr gjithmonë. Arsyeja e parë është se unë nuk bëj jetën e një të rrituri. Tendenca ime është që të qëndroj në anën e të rinjve, të përshtatem me kodin dhe kulturën e tyre. Së dyti, pse më tërheqin burrat më të rinj se vetja janë thjesht seksuale, u pëlqej atyre trupin e ëmbël dhe të freskët. E pranoj që më pëlqen roli i drejtuesit dhe se kam pushtet mbi burrin që dua. Së fundi e kam shumë të vështirë që të angazhohem. Nëna ime, e cila ishte 10 më e madhe se babai im, nuk ishte aspak e kënaqur me jetën që bënte, megjithatë nuk e pati asnjëherë guximin që të largohej nga im atë. Ndërsa unë e kam gjetur zgjidhjen. Nuk banoj me Nikon në të njëjtën shtëpi. Sa herë e kemi provuar një gjë të tillë, kemi dështuar. Tani po mendoj për një marrëdhënie të qëndrueshme dhe për këtë arsye i kam kërkuar Nikos që të bëjmë një fëmijë. Por ai nuk është i këtij mendimi dhe unë nuk dua ta detyroj, pasi isha unë ajo që shkova tek ai dhe jo ai tek unë. Megjithatë jam koshiente që diferenca e moshës mund të jetë sinonim i vështirësive për të ndërtuar një jetë të përbashkët nëse dëshirat tona nuk përputhen”.

Me të rifitova vitet që më kishin shkuar dëm
Majlinda, 43 vjeç, ka jetuar për disa kohë me Aleksandrin, 28 vjeç

“U martova në moshë të re dhe bëja një jetë të qetë së bashku me tim shoq dhe dy fëmijët tanë. Më vonë (tani bëhen 4 vjet), takova Aleksandrin, 28 vjeç, student në Mjekësi dhe shumë shpejt ramë në dashuri. Fillimisht ai u bë i dashuri im dhe shumë shpejt u ndava nga im shoq për të jetuar me Aleksandrin. Aleksandri çmendej pas meje, i pëlqente shumë kur bënim dashuri dhe ishte shumë dinamik. Ai më jepte gjithçka që më kishte munguar deri atëherë dhe m’u krijua përshtypja se po rifitoja vitet që më kishin shkuar dëm. Bëja përpjekje të mëdha për të ruajtur linjën dhe për të qenë gjithmonë e bukur. Më pas ai hapi klinikën e tij dhe unë fillova të bëhem xheloze. Kontrolloja në gjërat e tij, shkaktoja situata nga më të ndryshmet. Si përfundim po bëhet gati një vit që më ka lënë për të jetuar me një tjetër që është 10 vjet më e madhe se unë. Pendohem çdo ditë e më shumë që me sjelljen time e prisha marrëdhënien tonë. Tani jam në pritje të lidhem me dikë tjetër, por as që bëhet fjalë që ai të jetë i moshës time apo akoma më keq, më i madh se unë. Tashmë burrat më të rinj më janë bërë fiksim”.

Ana Oxa martohet me një 23 vjeçar

Eshtë në formë fantastike, por ka mbi shpinë shumë vite, plot 45. Pak ditë më parë ajo ka realizuar martesën e saj të katërt me Marko Sansonetin, i cili është 23 vjeç. Djali është me origjinë pulieze dhe ka qenë truproja i këngëtares së famshme para se të bëhej bashkëshorti i saj. Ashtu si në martesën me Pacollin, ku ajo nuk preferoi të veshë fustanin e bardhë të nuses, por veshje të zeza dhe transparente (pa sutjena) edhe këtë radhë ajo preferoi të bëhet nuse me rroba të zeza. Por në ndryshim nga martesa me Pacollin miliarder, tek kjo e fundit ajo ka bërë një ceremoni fare të thjeshtë duke thënë “Po” para kryetarit të bashkisë së Comos dhe larg vështrimeve kurioze. Ja pra, kjo nuk është një përrallë, por një realitet. Edhe pse duket si një trill i një gruaje të famshme, e cila ka provuar gjithçka në jetë, kjo tashmë ka ndodhur, Oksa ka guxuar të martohet me një burrë plot 22 vjet më të ri! Ata që kanë qenë dëshmitarë në martesën e Oksës pohojnë se ajo dukej e emocionuar si asnjëherë në jetë, ndërsa burri i saj i njomë, është paraqitur në bashki pa kravatë dhe me këmishë moderne, duke i premtuar bashkëshortes së ardhshme dashuri të përjetshme.

Çfarë e bën një burrë të tërhiqet nga një grua më e madhe?

Një marrëdhënie e tillë i jep kohë burrit të afirmohet, të vazhdojë të rritet, të mësojë në dashuri. Në këtë mënyrë ai kërkon te gruaja e tij më e madhe në moshë vazhdimësinë e nënës së tij. Nëse ndodh kështu gruaja rrezikon që duke vendosur pushtetin e saj mbi burrin, ky i fundit pas disa vitesh do ta ndiejë veten të shtypur dhe do revoltohet. Por mund të ndodhë edhe ndryshe, siç thotë edhe fjala e urtë popullore “Gruaja e bën burrin siç do vetë”.

Po gruan çfarë e tërheq tek një burrë më të ri se vetja?

Gratë paksa mashkullore janë gjithmonë në kërkim të burrave të cilët në forma të ndryshme shfaqin dobësi, ose delikatesë. Burrat e kësaj kategorie shpesh janë të vëmendshëm, të gjindshëm, shokë dhe dashnorë shumë të mirë. Ato pranojnë që gruaja e tyre të jetë e dëshirueshme dhe aktive gjatë aktit seksual. Por edhe në këtë rast mund të dalin probleme: burri tërhiqet më shumë nga një dimension intelektual, ndërsa gruan e tërheq më shumë seksualiteti. Në njëfarë mënyre kjo situatë ndeshet tek adoleshentët: shpesh është vajzë, e cila provokon kalimin në aktin seksual. Pra, ndodh sikur gruaja dhe burri të kenë ndërruar vendet me njëri- tjetrin. Tani i takon burrit të hezitojë dhe gruas të ngulmojë.

A janë të destinuar të dështojnë këto çifte?

Mund të ndodhë që djaloshi të jetë i kënaqur në fillim e më pas të bjerë në dëshpërim për këtë situatë martesore shumë të brishtë. Ndërsa gratë të shqetësuara nga fakti se mund të mos jenë aq tërheqëse, përpiqen me të gjithë mënyrat për të qëndruar gjithmonë të reja dhe të bukura. Por ndodh që një ditë edhe mund të lodhen, sidomos kur edhe djali e humbet freskinë tërheqëse të rinisë. Megjithatë nuk duhet harruar që kontradiktat janë të pranishme në të gjitha marrëdhëniet dashurore. Dhe vetëm kur këto kalojnë në plan të dytë, dashuria ka shanse të lulëzojë.

Kanë thënë për pasionet e “çmendura”

Pasioni i fuqishëm nuk është aspak ai i përjetshmi
Gëte

Njeriu duhet të ketë pasione, por edhe të jetë i zoti t’i bëjë zap ato.
Zhan Pol

Ajo që del nga zemra nuk është kurrë qesharake.
Kabaljero

Zemra nuk ka rrudha, ajo ka vetëm blana.
Koleti

Burim i shqetësimeve tona janë lajthitjet tona.
Mesijon

Edhe zemra gjithashtu gënjehet, si edhe mendja lajthitjet e saj nuk janë më pak të rrezikshme, por janë edhe më të vështira për t’u ndrequr, për shkak të dhimbjes që i shoqëron.
Frans

Një minutë kënaqësi shpesh bëhet shkas për vuajtje të gjata.
Vilend

Pasionet, ndonëse janë shakatare të lajthitjeve tona të shumta, shërbejnë megjithatë si motorë të përparimit.
Helvec

Studimi

Niveli i testosteronit të një burri bie lehtësisht me kalimin e viteve, ashtu si bie edhe dëshira për seks. Impulsi seksual i një gruaje rritet gradualisht derisa arrin kulmin në moshën 36 deri në 38 vjeç. Kjo shpjegon dhe faktin pse shumë gra në këtë moshë preferojnë burra më të rinj se vetja. Performanca seksuale e një 20-vjeçari është kompatibël me atë të një gruaje 40-vjeçare. Ndërsa dëshira seksuale e një 40-vjeçari është kompatibël me atë të një 20-vjeçareje. Kjo shpjegon edhe lidhjen e burrave 40-vjeçarë me vajza 20-vjeçare. Kur pohohet se dëshira seksuale e një burri arrin kulmin në moshën 19-vjeçare dhe bie me kalimin e kohës, i referohemi nivelit të performancës fizike. Interesi për seksin gjithsesi mbetet i lartë për shumë vite. Kjo do të thotë se edhe një 70-vjeçar mund ta dashurojë seksin tjetër njëlloj sikur të jetë 30 vjeç, por në krevat ai nuk arrin të finalizojë një akt seksual. Një femër mund të jetë shumë e tërhequr nga seksi gjatë viteve të adoleshencës (sepse ajo e lidh gjithçka me dashurinë), por ndjen një dëshirë të limituar seksuale. Ndërsa 30 vjeç, kjo dëshirë dhe ky interes rritet mjaft dhe vazhdon duke u rritur edhe për shumë vite akoma.

Të vetëdijshëm për vështirësitë

Nuk është e lehtë të gjesh lumturinë në çiftet me diferencë të madhe moshe në krahasim me një relacion, ku çifti ka një diferencë moshe jo shumë të theksuar. Gruaja e pjekur dhe burri më i ri duhet të përballet me problemet e të gjithëve, por edhe me vështirësi të pazakonta. Meqenëse zgjedhja e partnerit nuk është ajo e zakonshmja, të gjithë të afërmit e burrit, por edhe të gruas do të jenë të predispozuar për të të bërë një listë anësh negative, që shoqëron bërjen e kësaj zgjedhjeje. Pra që në fillim çifti do të jetë koshient për vështirësitë që e presin. Por nëse këto tipa çiftesh reflektojnë seriozisht mbi vështirësitë mbi motivet dhe nevojat reciproke, arrijnë në konkluzionin se ata të dy arrijnë të plotësojnë njëri-tjetrin dhe integrohen mirë në jetën në çift. Vetëm në këtë mënyrë mundësia për të qenë të lumtur në çift nuk ka se si të jetë më e vogël se ajo e çdo çifti tjetër tradicional.