Këngëtarja e njohur e skenës muzikore shqiptare, Irma Libohova, do të përballet sërish në gjykatë në një proces civil me përfaqësuesit e shtëpisë diskografike “Shqipja 2000”.

Konflikti i lindur dy vjet më parë midis këngëtares dhe shtëpisë diskografike për prishjen e një kontrate përfundoi me një vendim gjykate kundër Libohovës, e cila duhej të dëmshpërblente “Shqiponja 2000” me 2 milionë lekë të reja. Vendimi ka marrë formë të prerë, por ende këngëtarja Libohova nuk e ka zbatuar atë. Madje në emër të saj nuk rezulton asnjë pasuri që do të sekuestrohej në shkëmbim te dëmshpërblimit. Në Prokurori është ngritur një padi penale, ku këngëtarja e njohur akuzohet për falsifikim, një padi civile ka nisur shqyrtimin dje në Gjykatën e Tiranës. Janë sërish përfaqësuesit ligjorë të shtëpisë diskografike, të cilët pak ditë më parë i janë drejtuar gjykatës me një kërkesë, për shfuqizimin e kontratës dhe akt-dhurimit që këngëtarja i ka bërë, duke e kaluar pasurinë e saj në emër të djalit të saj. Një pikë tjetër e padisë është edhe kërkesa për sekuestrimin e një vile në plazhin e Golemit. Kjo pronë figuron në emrin e këngëtares dhe pala paditëse kërkon sekuestrimin e saj. Në bazë të vendimit të gjykatës, këngëtarja që prej një viti detyrohej t’i paguante shtëpisë diskografike shumën e 20 milionë lekëve të vjetra.

Procesi
Dje në Gjykatën e Shkallës së Parë është zhvilluar seanca e parë përgatitore e shqyrtimit të padisë, ku palët, pasi nuk kanë pranuar ta zgjidhin çështjen me pajtim, kanë paraqitur pretendimet e tyre. Mësohet se përfaqësuesit e shtëpisë diskografike, të cilët janë edhe paditësit, kanë paraqitur të gjitha pretendimet në lidhje me kërkesën që i kanë drejtuar gjykatës. Ata kanë pretenduar se do ta paraqesin si provë për pronësinë e këngëtares, e cila ia ka dhuruar të birit pasurinë. Padia po shqyrtohet nga gjyqtari Altin Shkurti, i cili, pasi ka dëgjuar pretendimet e palëve në konflikt, ka caktuar një ditë të javës së ardhshme për paraqitjen e provave nga të dyja palët në konflikt. Këngëtarja e njohur e skenës shqiptare, Irma Libohova, është thirrur edhe në Prokurori, ku ka dhënë sqarime rreth denoncimit të bërë ndaj saj nga administratori i shtëpisë diskografike “Shqipja 2000”, Arben Duro. Ky i fundit e ka denoncuar Irma Libohovën për veprën penale të “pengim të ekzekutimit të vendimeve”. Denoncuesi pretendon se Irma Libohova ka penguar ekzekutimin e vendimeve nga Përmbarimi, lidhur me një vendim të Gjykatës së Lartë të dhënë në prill të vitit 2005.

• 2 milionë
  lekë të reja është shuma që këngëtarja duhet të dëmshpërblejë shtëpinë diskografike “Shqipja 2000”, për prishjen e njëanshme të një kontrate disa vite më parë
  
• 1 vit
  më parë është marrë vendimi i Gjykatës së Lartë i formës së prerë, sipas të cilit, Irma Libohova duhej të paguante për prishjen e kontratës me “Shqipja 2000”