Roberto Mançini dhe Interi duhet të jenë gati të kryqëzojnë sërish fatet e tyre. Klubi zikaltër duket se do t'i afrojë së shpejti rinovimin e kontratës trajnerit 42-vjeçar. Ideja është e Gabriele Orialit, njeri i afërt me Mançinin, lëvizje që do të mbyllte një herë e përgjithmonë zërat që qarkullojnë se trajneri është në dyshim. Gjithsesi, pjesa tjetër e drejtuesve nuk është e sigurt për këtë gjë dhe vazhdon të flitet për pasardhësit e mundshëm, Erikson apo Mourinjo.
Fillimi i sezonit para së gjithash në pjesën e tij europiane, nuk mund të konsiderohet sigurisht në lartësinë e pritur. Kështu, sipas thashethemeve që vijnë nga Apiano Xhentile, Interi mund të mendojë edhe për ndonjë "revolucion". I pari, ai që mund të shkojë në "ferr", është "timonieri" i radhës. Roberto Mançini ka, siç dihet, një "kartë krediti" të plotë për ta shpenzuar nga ana e Moratit, por edhe numri një nuk e ka fshehur asnjëherë stimulin e tij për ish-sampdorianin, megjithatë re kërcënuese kanë filluar të bien mbi Roberton. Edhe padroni zikaltër nuk është edhe aq shumë kategorik për të mbrojtur punën e trajnerit dhe me pjesën e drejtuesve, skeptikë prej kohësh, mbetet vetëm Oriali ai që nuk ka dyshime për të ardhmen e Mançinit. Dhe pikërisht nga këshilltari i merkatos zikaltër vjen një ide që në klubin interist po e konsiderojnë me kujdes. Duke filluar që nga e ardhmja e klubit. Oriali paska propozuar zgjatjen e marrëveshjes me Mançinin, para së gjithash për t'i dhënë një sinjal të qartë stabilitetit të lojtarëve, disa prej të cilëve kanë mosmarrëveshje me "Mançion". Përveç grindjeve historike me Adrianon, Rekobën, Toldon e me të tjerët, duket se numri i futbollistëve kundër trajnerit po shtohet dita-ditës. Një hap i vendosur si ai i propozuar nga Oriali, sipas shtypit italian, do të shkonte në drejtimin e shuarjes së "zjarreve" të rrezikshme në brendësi të grupit, por nuk do ta pengonte Moratin nëse do ta shikojë të arsyeshme të ndryshojë trajner gjatë kampionatit ose në fund të sezonit. Kontratat vlejnë, siç dihet, por edhe mund të zgjidhen në çdo moment. Ndërkohë, duket se Mançini është duke blerë një banesë të re në qendër të Milanos, optimist se kontrata e re e mundshme të mos jetë një besim i përkohshëm.
MERKATO FRANCEZE - Nga ana tjetër, trajnerit zikaltër nuk i ka mjaftuar tërë ajo merkato e bërë gjatë verës, por i është drejtuar padronit Morati: "Duhen përforcime". Dhe numri një i klubit, si gjithnjë dorëlëshuar për Interin, ka vendosur ta kënaqë: duket se kanë filluar dy bisedime me Lionin për të arritur dy objektiva të ardhshëm. Në janar mund të vijë Alou Diarra, që kampionët e Francës e morën në gusht nga Lensi. Ndërsa në qershor bëhet fjalë për ardhjen e Florent Maludasë, mesfushorit 27-vjeçar me cilësi të mëdha. Por aktiviteti në shtëpinë zikaltër nuk mbaron këtu. Të tjerë lojtarë të ndjekur me interes të madh janë empolezi Almiron dhe "valenciani" Tavano, në krizë me klubin e tij të ri në Spanjë. Pa harruar ëndrrën Bufon, prej kohësh një "benjamin" i Masimo Moratit. Shpenzime, shpenzime dhe vetëm shpenzime...