Kapiteni i Gjermanisë, Mikael Balak, synon të ndihmojë Çelsin të rrisë më tej avantazhin ndaj Barcelonës, për të marrë vendin e parë në grupin A të Ligës së Kampioneve, në dy takimet e drejtpërdrejta që kampionët e Anglisë do të luajnë me fituesit e edicionit të kaluar të Championsit. Vjet, "Blutë" e Mourinjos u eliminuan nga katalanasit në çerekfinale. Ja cila ka qenë intervista e mesfushorit...
- Çelsi-Barcelona, një "klasike" e kontinentit...
- Çelsi-Barcelona apo Barcelona-Çelsi është e njëjta gjë, një sfidë me nivel të lartë pasioni dhe ndikim në të gjithë botën. Po flasim për "të mëdhatë" e futbollit. Skuadra me futbollistë të jashtëzakonshëm dhe që dinë të luajnë së bashku. Asgjë s'mund të krahasohet me këtë sfidë.
- Thuhet se nuk e keni gjetur ende ritmin ideal dhe se blerjet e reja të Çelsit ende nuk janë ingranuar si duhet...
- Ndaj Barcelonës do të tregojmë nëse e kemi gjetur apo jo ritmin. Nëse jemi një ekip i konsoliduar apo jo.
- Edhe Shevçenko po përballet me disa vështirësi...
- Si i gjithë ekipi, edhe ai ka më shumë për të dhënë, por ka nevojë ende për kohë.
- Por, a mund të flasim për një çështje "Sheva"?
- Si të gjithë futbollistët e mëdhenj individualistë, edhe ai duhet të kuptojë se duhet të luajë vetëm për të mirën e skuadrës, asgjë tjetër. Te Çelsi, ku ekziston një ambient i mrekullueshëm, të gjithë janë yje, nga portieri deri te sulmuesi. Çeh, Terri, Karvalho, Lampard, Drogba, Kalu, Makelele, Esien, Shevçenko...janë të gjithë "asa".
- Si ndiheni me shokët e rinj?
- Shumë mirë, janë njerëz të mrekullueshëm. Mendojnë shumë për stërvitjen dhe për punën në grup. Dy javë më parë, në ditën e 30-vjetorit, më organizuan një festë surprizë së bashku me bashkëshorten time.
- Po Mourinjo?
- Ishte i ftuar, por preferoi të shkonte në shtëpi. Mendoi se ishte më mirë që ne futbollistët të qëndronim me njëri-tjetrin.
- Çfarë tipi është Mourinjo?
- Eshtë një tip gjenial. Një person i mirë, i besueshëm dhe që pëlqen dialogun. Merr shpesh nismën dhe si trajner i ri që është, nuk ka frikë të eksperimentojë dhe të besojë te talentet.
- Jo të gjithë mendojnë kështu për të...
- Pranova të firmos kontratën me Çelsin pikërisht për shkak të atmosferës së shkëlqyer që ka kjo skuadër, për elementët cilësorë dhe për trajnerin që e drejton.
- Mund të ki**** qenë një futbollist i Barcelonës, por tani do t'i sfidoni katalanasit me fanellën "blu"...
- Pata një kontakt me Barcelonën në verën e vitit 2004, por për disa arsye transferimi nuk u krye. Gjithsesi, ajo i përket së kaluarës dhe tani jam pjesë e Çelsit, një skuadër që do të fitojë gjithçka, e njëjta ambicie që kam edhe unë.
- I druheni Barcelonës?
- Vetëm respekt. Pa dyshim që është kundërshtari më i fortë në grup dhe vjet ka bërë një edicion të shkëlqyer. Nuk do të luajë Eto, i cili ishte thelbësor për Barcelonën në ndeshjen e fundit. Pavarësisht se nuk ka shkëlqyer, ka treguar se është një lojtar që di të shënojë.
- Po Ronaldinjo?
- Eshtë fenomenal, por të mërkurën nuk do të jetë koha për të parë futbollin e tij. Do të jetë dita e Çelsit. Jemi shumë të vendosur për këtë. Besoj verbërisht te triumfi.
- Sa mund të ndikojë mbështetja e publikut?
- Jashtë mase. Tifozët tanë janë të mrekullueshëm dhe i gjithë ambienti është në pritje të një fitoreje. Pres një atmosferë të shkëlqyer.
- Ndonjë faktor surprizë...cila është "receta" taktike për të mundur kampionët e Europës?
- Kjo i përket Mourinjos. Unë mendoj vetëm për të zbatuar me përpikmëri detyrat që do të më japë.