Del Piero, i "xhindosur" për lënien jashtë

Ka gjithnjë një tip Kapeloje në rrugën e tij. Aleks Del Piero ishte i bindur se e kishte hequr qafe "armikun" e tij, edhe pse po kalon një moment të vështirë me Juven, e cila është vendosur në pozita të vështira, për shkak të skandalit të Serisë A. Veç për t'u aktivizuar si titullar, ai ka pranuar të luajë edhe në Serinë B. Atje ka rizbuluar kënaqësinë për ta kthyer ekipin në Serinë A, duke shënuar gola dhe duke luajtur me vazhdimësi. Është kjo fjala magjike që ka më tepër për zemër "Pinturikio": të arrijë të grumbullojë një numër pjesëmarrjesh të konsiderueshme, të denja për "kurrikulumin" e tij të pasur. Ai shpresonte se këtë mund ta bënte edhe në kombëtare, falë një trajneri si Donadoni, i cili nuk është krejt pa përvojë, por që mund të besonte tek eksperienca e një kampioni të mënjanuar. Por ja që në harkun e katër ditëve, marrëdhënia mes teknikut dhe kapitenit të Juves duket se është prishur. Më parë mbërriti zëvendësimi gjatë sfidës ndaj Ukrainës, ndërsa më pas edhe mosaktivizimi në sfidën e Tbilisit ndaj Gjeorgjisë. Del Piero nuk u la as në stol, por në tribunë si spektator. Shokët e Juves e mbrojnë, por ekziston përshtypja se marrëdhënia mes Aleksit dhe kombëtares ndodhet ndoshta në hapat e fundit. Vetë futbollistit i ka ardhur shumë inat për lënien e papritur në tribunë, në ndeshjen e Tbilisit ndaj Gjeorgjisë, të cilën Italia e fitoi 3-1. Kapitenit të Juves (80 ndeshje, 27 gola, shënuesi më i mirë i Italisë nga lojtarët që luajnë ende) nuk i ka ardhur mirë për shpërfilljen e trajnerit, të cilit i ka kërkuar një sqarim përfundimtar.
Nëse Del Piero nuk do të marrë garanci për të ardhmen, mund të vendosë edhe të mos kthehet më në kombëtare. Gjatë udhëtimit të kthimit nga Gjeorgjia, ka pasur një ballafaqim të ndezur midis lojtarit dhe trajnerit, i cili i ka argumentuar natyrën teknike të zgjedhjes së tij. Del Piero nuk është dukur aspak i kënaqur. Italia do të kthehet në fushë në mes të nëntorit, me rastin e miqësores ndaj Turqisë, e cila do të luhet në Bergamo për të nderuar kujtimin e Xhiaçinto Faketit, i cili ka qenë kapiten e kombëtares italiane, me të cilën luajti 93 ndeshje. Ndërkohë, ndeshja Gjeorgji Itali u ndoq në kanalin Rai Uno nga thuajse 10 milionë e gjysmë spektatorë italianë.