MALLAKASTËR

Për plot 45 minuta kanë terrorizuar pasagjerët e një autobusi dhe të një furgoni. Tre maska nën kërcënimin e kallashnikovëve, kanë mundur të grabisin vetëm shoferin dhe pasagjerët e automjetit të dytë, pasi drejtuesi i autobusit ka guxuar të kundërshtojë plaçkitjen, duke vazhduar udhëtimin për në jug të vendit. Ngjarja e rëndë ka ndodhur mëngjesin e djeshëm në rrugën nacionale Ballsh-Tepelenë. Pas sinjalizimit, policia është vënë në kërkim të autorëve të krimit, por ende nuk është bërë i mundur arrestimi i tyre. Burime zyrtare nga Drejtoria e Policisë së Qarkut të Fierit, bëjnë të ditur se rreth orës 05:30, tre persona ende të paidentifikuar kanë ndaluar autobusin e linjës Fier-Gjirokastër (afër rrugës dytësore Selitë-Gjerbës). Të maskuar dhe të armatosur, ata kanë tentuar të grabisin pasagjerët. Megjithëse nën kërcënimin e armëve, shoferi i automjetit ka debatuar ashpër me maskat. Ai ka refuzuar grabitjen e pasagjerëve të tij, ndërsa këta të fundit kanë përjetuar momente tmerri. Të stepur nga guximi i shoferit, autorët e krimit janë tërhequr, duke e lënë mjetin që të vazhdonte rrugën për në Gjirokastër. Vetëm pak minuta më pas, tre maskat kanë ndaluar në rrugë një furgon që vinte nga Selita dhe po udhëtonte për në drejtim të qytetit të Ball****. Kësaj here, ata nuk kanë dështuar në “misionin” e tyre, pasi i kanë grabitur me forcë 3.500 lekë, shoferit Vladimir Zota dhe 15 mijë lekë, dy bashkëshortëve, Ali dhe Feruze Sulaj që po udhëtonin si pasagjerë. Ndërkohë, gjatë grabitjes është dëmtuar lehtë Zoto. Po të njëjtat burime sqarojnë se ka qenë drejtuesi i autobusit, ai që ka sinjalizuar për ngjarjen (ka telefonuar tek 129-ta). Menjëherë policia ka nisur punën për vënien në pranga të grabitësve. Rishfaqja e maskave në këtë aks rrugor ka alarmuar blutë e Fierit. Kjo, edhe për faktin se është hera e tretë brenda këtij viti, që maskat grabisin drejtuesit dhe pasagjerët e automjeteve të ndryshme në këtë aks rrugor.