Procesi gjyqësor, i cili pritet të fillojë së shpejti ka për bazë një padi të bërë nga ish-ndërmarrja shtetërore "Albtransport". Kjo e fundit ka hedhur në gjyq kompaninë "Albatros", për shkak të borxhit rreth 443 mijë dollarë. Bëhet fjalë për borxhin, i cili është pohuar si shkaku zyrtar i bllokimit të fluturimeve të kompanisë "Albatros". Padia e bërë në adresë të kompanisë së drejtuar nga njerëz të afërt të familjes së presidentit mësohet se është regjistruar në Gjykatën e Tiranës. Kjo e fundit ka filluar shqyrtimin e materialeve të padisë, me qëllim nisjen e shqyrtimit gjyqësor në ditët e ardhshme. Lajmi u konfirmua dje nga burimet zyrtare, sipas të cilave objekti i gjyqit civil mes dy palëve janë pagesat e prapambetura të "Albatros" ndaj shoqërisë "Albtransport". Kjo e fundit bashkë me dokumentin e padisë mësohet se ka dorëzuar në Gjykatën e Faktit në kryeqytet edhe një numër të konsiderueshëm shkresash për shërbimet që i janë ofruar kompanisë së fluturimeve, të bllokuar tashmë që nga 30 gushti i këtij viti.

BORXHI
Sipas burimeve nga Gjykata e Tiranës, shoqëria "Albtransport" bën fjalë në padinë e saj për shuma financiare të papaguara nga kompania "Albatros" gjatë vitit 2006. Kompania e fluturimeve "Albatros" mësohet të jetë renditur e gjashta në listën e debitorëve të "Albtransport", për nga shuma e detyrimeve të prapambetura. Shuma e borxhit është krijuar nga shërbimet që "Albtransport" u ofron kompanive ajrore për një çmim të caktuar, i cili duhet të paguhet periodikisht. Në rastet e prapambetjes së pagesave parashikohet që kompanitë të negociojnë mes tyre për mënyrën e shlyerjes së borxhit. Aksionerët e kompanisë që i janë bllokuar fluturimet për shkak të borxheve janë shprehur se po negocionin me "Albtransportin" për të bërë pagesën e borxheve. Përfaqësuesit e kompanisë së fluturimeve "Albatros" kanë pohuar më tej se kanë pretendimet e tyre për shumën e borxhit. Ata kanë ofruar shembuj, duke thënë se nuk mund të paguajnë për energjinë e konsumuar nga prozhektorët e aeroportit për rastet kur ulja ose ngritja e avionëve është bërë ditën.

BLLOKIMI
Shkaku zyrtar i deklaruar për bllokimin e "Albatros" nga Drejtoria e Përgjithshme e Aviacionit Civil dhe Ministria e Punëve Publike, Transportit dhe Telekomunikacionit kanë qenë borxhet. Ato janë krijuar gjatë 6-mujorit të parë të këtij viti, ndërsa "Albtransport" ka shkëmbyer disa shkresa me kompaninë e fluturimit që rezulton debitore. Pas dështimit në përpjekjet e para për të bërë pagesën e borxhit, njëra palë i është drejtuar gjykatës duke kërkuar zgjidhjen ligjore të çështjes. Sipas procedurës që parashikon ligji, nëse në fund të gjykimit civil, gjykata arsyeton se "Albatros" ka një sasi borxhi ndaj kompanisë paditëse, atëherë togat e zeza veprojnë me një urdhër. Ky urdhër i dërgohet Përmbarimit, i cili duhet të sekuestrojë një pronë ose një llogari bankare me vlerë sa shuma e borxhit që është bërë objekt i padisë civile. Nëse pala e paditur nuk shlyen borxhin në rrugë të tjera, atëherë prona e saj me vlerë sa shuma e borxhit sekuestrohet dhe me vendim gjykate kalon në pronësi të palës tjetër.

Dibra i pandehur për "Albatros"

Bllokimi i fluturimeve të kompanisë "Albatros" dhe publikimi i bisedave të zhvilluara mes aksionerëve dhe Gazmend Dibrës, është bërë shkak për nisjen e hetimeve ndaj këtij të fundit. Dibra është marrë i pandehur për dy akuza, ndërsa me kërkesë të Prokurorisë, Gjykata e Tiranës i ka ndaluar ish-kreut të Aviacionit Civil largimin nga Shqipëria deri në përfundim të procesit penal.