Asnjë platformë “Nano” nuk pritet të paraqitet sot në Asamblenë Kombëtare të PS-së. Megjithëse ish-kryetari kishte lajmëruar nëpërmjet bashkëpunëtorëve të tij të afërt se ndoshta vendi më i mirë për ta institucionalizuar nismën e tij do të ishte Asambleja, asgjë nuk pritet të ndodhë. Burimet bëjnë të ditur se ende nuk ka ardhur momenti që ish-kryetari të shpallë platformën e tij “për një opozitë ndryshe”. Deri më tani askush nuk pohon se ka një dokument të plotë, edhe pse u trumbetua si një lëvizje që do të sillte ndryshim në partinë më të madhe të opozitës. Në pikat që Nano dhe grupi i deputetëve që iu bashkua kishin hedhur në draft-platformën, thuhej se “PS-ja duhet të kishte kryer reformimin e saj të brendshëm”, ndërsa konstatonte se gjendja dhe cilësia e opozitës ka dështuar. Me ironi, Nano shprehej edhe për koalicionin që Rama ribëri me partitë e tjera opozitare. “Sfida e rezultatit të zgjedhjeve të ardhshme lokale dhe përgjegjësitë që rrjedhin, nuk mund të fshihen pas asnjë koalicioni”, - thuhej në pikat e projekt-platformës “Nano”, por që ende nuk është bërë publike. Burimet thanë se ish-kryetari Nano mendoi që tonet e shprehura në këto pika të platformës duheshin zbutur dhe prandaj duhej riparë dokumenti, por deri më tani asgjë e re nuk është bërë publike nga lëvizjet e tij.
Asambleja
Socialistët do të mblidhet sot në orën 12:00, në një nga sallat e hotel “Sheraton” në Tiranë për të diskutuar në lidhje me përgatitjet për fushatën zgjedhore për organet e pushtetit vendor. Ata pritet të miratojnë të gjitha rregulloret e brendshme të strukturave partiake, por edhe kriteret dhe procedurat e përzgjedhjes së kandidatëve për këto zgjedhje. Kryetari Edi Rama ka përgatitur në një formë disi ndryshe këtë herë, gjithë instruksionet që do t’u japë të zgjedhurve vendorë. Në një ekran të madh ai do të paraqesë procedurat e përzgjedhjes së kandidatëve dhe gjithë skemën se si do të arrihet në përzgjedhjen e një liste fituesish së bashku me partitë e tjera të koalicionit. Nisur edhe nga problemet e para që janë shfaqur në bazë, pritet që të zgjedhurit të marrin porosinë që të shmangin në çdo rast kontradiktat me aleatët gjatë këtij procesi.

bashkepunetoret

• Andis Harasani
  Është një nga mbështetësit e parë të lëvizjes së re të ish-kryetarit socialist, Fatos Nano. Ai u shpreh dje se në fakt nuk ishte në dijeni se ç’po bëhej me platformën që Nano hodhi në opinionin publik pak kohë më parë. Harasani u shpreh hapur pro Nanos në lançimin e nismës së re.
  
• Taulant Balla
  Një prej ish-bashkëpunëtorëve më të afërt në qeveri, por edhe pas dorëheqjes së Nanos nga PS-ja, e cilësoi lëvizjen e re “Nano” si një lëvizje që synonte modernizimin e PS-së dhe opozitës në përgjithësi, për ta bërë atë më evropiane. Edhe ai si Harasani, nuk është në dijeni të hapave të fundit të Nanos
  
• Shpëtim Idrizi
  Njeriu që në fakt i ka qëndruar më pranë, sidomos gjatë udhëtimeve jashtë Shqipërisë ish-kryeministrit Fatos Nano, është shumë i tërhequr në deklarimet publike. Ai u shpreh ndër të parët dakord me nismën e re të ish-kryetarit, por që ende duket se ka mbetur thjesht në faqet kompjuterike.