E kaluara e tij e lavdishme mund t'u rikthehet edhe një herë sukseseve të mëdha në Itali. Sidomos tani, ku gjërat në shtëpinë e Interit nuk po shkojnë drejt rrymës së duhur. Hija e Sven Goran Eriksonit ka pak kohë që ka rënë mbi Roberto Mançinin. Trajneri interist ka përpara dy javë vendimtare: fillon më 18 tetor me ndeshjen kyçe të Ligës së Kampioneve kundër Spartakut të Moskës, ku zikaltrit duhet të fitojnë. Në rast të kundërt, Morati ka përgatitur "kartën" Erikson për stolin. "Sveni ka marrë oferta të rëndësishme", - shpjegon menaxheri i suedezit. Edhe shifrat janë kundër Mançinit: Kuperi është shkarkuar pikërisht më 19 tetor.
Roberto Mançini nuk mund të qëndrojë sigurisht i qetë në këtë periudhë. Përveç se është ulur në një stol "tronditës", vijnë edhe kandidaturat e mundshme nga jashtë për zëvendësimin e tij. Ish-trajneri i kombëtares angleze, Sven Goran Erikson, është konsideruar nga shumë njerëz si pasardhësi i mundshëm i "Mançios" në stolin zikaltër dhe ai që e kofnfirmon, edhe pse jo qartësisht, është menaxheri i trajnerit suedez, Atol Still, në një emision radiofonik në "BBC". "Po, kemi marrë shumë oferta të rëndësishme, - shpjegoi Stilli, - dhe Sveni është shumë afër kthimit në futbollin e madh. Gjendja e të papunit nuk e zbavit aspak, është nga ata njerëz që është mësuar të punojë dhe të qëndrojë në fushë. Mund të siguroj se është gati për një sfidë të madhe." Dhe mendja të shkon menjëherë pikërisht tek Interi, i drejtuar në këto momente nga njëfarë Roberto Mançini që e ka pasur si lojtar, në fillim te Sampdoria dhe pastaj te Lacio (ajo e titullit), derisa për një kohë qëndruan në krah të njëri-tjetrit, ndonëse për pak muaj, në stolin e bardhekaltërve në sezonin 2000-2001.
Mançini tashmë është në provë në javët e fundit, ndaj nuk duhet të gabojë në ndeshjet e ardhshme, as në kampionat dhe as në Champions. Në Europë, pas humbjeve me Sportingun e Lisbonës dhe Bajernit të Mynihut, Interi duhet të fitojë absolutisht sfidën e dyfishtë me skuadrën ruse, edhe pse nuk mund të mjaftojë për të synuar të kalojë turin e parë të veprimtarisë prestigjioze europiane.
Ndër të tjera, në kampionat, zikaltrit duhet të qëndrojnë të paktën afër kreut, ndaj duhet të mundin Katanian, Udinezen e Livornon në fillim, para derbit me Milanin më 28 tetor. Një "tur force" për të mos u nënvlerësuar për skuadrën e Mançinit.
Për të larguar fantazmat e shkarkimit, Mançini duhet të fitojë sfidën e tretë të Championsit ndaj Spartakut të Moskës në "San Siro" më 18 tetor. Ndërkohë, shifrat janë kundër trajnerit 42-vjeçar. Më 18 tetor 2003, Hektor Kuper, atëherë trajner i zikaltërve, luajti për "stolin" me një barazim 2-2 në Breshia. Dhe më 19 u largua nga Pinetina. Mançini është paralajmëruar.
Erion ABULE

Interi këmbëngul për Xhixhi Bufonin
Interi hap "sytë" dhe mendon, duke pasur në mendje vetëm atë dhe një objektiv të caktuar: të veshë zikaltër Xhixhi Bufonin. Ndoshta që në janar, por edhe në korrik. Padron Morati ka një plan të ri për t'ia marrë Juves kampionin e botës: 30 milionë euro klubit bardhezi dhe një rrogë prej 6 milionësh në sezon portierit. Në paketë mund të përfshihet edhe Toldo, por para së gjithash mbrojtësi argjentinas Burdizo. Por nuk do të jetë e lehtë. Për dy motive. E para, rezistenca e Koboli Xhiljit dhe e Juves. E dyta, rikthimi në "lojë" i Milanit. Klubit kuqezi nuk po rinovon dot kontratën e Didës, që do të thotë një "kambanë alarmi" për Moratin.

Pergatiti: Arbi Hoxha

Per kontakt : Arbi_1999@hotmail.com