Hetuesit e dosjes "Albatros" kanë siguruar një tjetër dëshmi për bisedën e përgjuar mes ish-drejtorit të Aviacionit Civil, Gazmend Dibra dhe dy bashkëpronarëve të shoqërisë ajrore "Albatros". Obenc Vokopola, aksioneri i tretë i shoqërisë "Albatros" ka dëshmuar në prokurori në lidhje me bisedën e përgjuar dhe të bërë publike në media. Burime të Gazetës janë shprehur se edhe Vokopola, ashtu sikurse dy ortakët e tjerë të shoqërisë, ka pranuar vërtetësinë e bisedës që dëgjohet në kasetën e administruar tashmë nga prokuroria. Vokopola tashmë mund të quhet si dëshmitari i tretë për akuzat të ngritura ndaj Gazmend Dibrës. Ky i fundit akuzohet për shpërdorim detyre dhe korrupsion pasiv. Vetë Dibra nuk i ka pranuar akuzat, ndërkohë që nuk ka dhënë sqarime për bisedën e përgjuar, ku pretendohet se nëpërmjet pezullimit u është ushtruar presion pronarëve të "Albatros", që janë edhe nipa të Presidentit Alfred Moisiu, në mënyrë që ky i fundit të firmoste shkarkimin e kryeprokurorit Theodhori Sollaku. Ndërkohë, disa ditë më parë, Gjykata e Tiranë me kërkesë të prokurorisë, ka vendosur si masë shtrënguese sigurie, që të mos lejojë Gazmend Dibrën të dalë jashtë vendit deri në përfundimin e plotë të hetimeve të nisura ndaj tij.