Zogu i Zi, merren në pyetje zyrtarë të Bashkisë

Dosja për nënkalimin e Zogut të Zi, së shpejti pritet të ketë zhvillime konkrete, që do të zbardhin të vërtetën e kësaj çështjeje kaq shumë të përfolur edhe në qarqet e politikës shqiptare. Burime të gazetës kanë pohuar se organi i akuzës, tashmë ka në dorë ekspertimin teknik që i është bërë projektit të nënkalimit, ku pyetja kryesore ka qenë, nëse projekti në fjalë ishte i përshtatshëm për funksionin që duhej të kryente dhe nëse jo, rreziqet që paraqiste. Edhe pse hetuesit e çështjes nuk kanë pranuar të bëjnë të ditur asnjë konkluzion të ekspertëve, burime konfidenciale janë shprehur se në bazë të këtij ekspertimi, pritet që së shpejti kjo dosje të ketë persona të pandehur. Kjo të lë të kuptosh se ekspertët kanë vërejtur mangësi në projektin e nënkalimit. Në lidhje me këtë çështje, ditët e fundit hetuesit kanë marrë në pyetje edhe disa zyrtarë të Bashkisë së Tiranës, të cilët kanë qenë pjesë e grupit të punës së projektit të ish-nënkalimit të Zogut të Zi.
Dëmi
Tashmë që nënkalimi i Zogut të Zi nuk ekziston më, pyetja që kërkon përgjigje është se kush do t'i paguajë milionat e humbura në atë ndërtim. Pika më e nxehtë e këtij hetimi, duket se është akuza "e shpërdorimit të fondeve publike" dhe gjetja e personave përgjegjës. Për të vërtetuar ekzistencën e kësaj akuze, hetuesit e çështjes vendosën edhe kryerjen e ekspertimit teknik të objektit,i cili nuk ka pasur oponencë. Në rast se ekspertimit do të vërtetojë se projekti i ndërtimit të nënkalimit të Zogut të Zi nuk ishte funksional, paraqiste rreziqe dhe kishte mangësi serioze në dokumentacion, atëherë zyrtarët që kanë firmosur ndërtimin e tij, pritet të mbajnë përgjegjësi penale për akuzën "e shpërdorimit të fondeve publike". Vlera e këtyre fondeve, duke përllogaritur vetëm fazën në të cilën kishte arritur ndërtimi i nënkalimit, përllogaritet të jetë mbi 1 milion dollarë.
Kallëzimi
Hetimet për nënkalimin e Zogut të Zi nisën në mars të këtij viti, pas një kallëzimi të bërë nga Policia Ndërtimore ndaj Bashkisë së Tiranës dhe kreut të saj, Edi Rama. Të gjitha shkeljet e denoncuara nga Policia Ndërtimore, kanë të bëjnë me dokumentacionin dhe veprimet e kryera nga Bashkia e Tiranës për ndërtimin e nënkalimit te Zogu i Zi. Sipas materialit kallëzues, kryebashkiaku Rama akuzohet për shkatërrim rrugësh, pushtim toke, shpërdorim detyre, shpërdorim të kontributeve të dhëna nga shteti, të gjitha këto të kryera në bashkëpunim. Por deri tani, hetimet e kryera nuk kanë identifikuar ndonjë zyrtar të dyshuar për akuzat e ngritura. Sakaq, edhe kryebashkiaku Edi Rama ka dorëzuar në Prokurori një tjetër kallëzim ndaj personave që urdhëruan prishjen fizike të nënkalimit.