Propozohen ndryshime për paketën fiskale 2007, kërkesat mbrojnë biznesin prodhues

Biznesi prodhues i përfaqësuar nga Konfindustria Shqiptare, ka propozuar rishikimin e 17 pikave për paketën ekonomike-fiskale të vitit 2007. Për herë të parë, po nis një lobim për të mbrojtur ineteresat e biznesit prodhues. Konfindustria Shqiptare do të nisi debatin me të gjitha grupet e interesit, për ndryshimet e nevojshme që duhet të rishikohen në paketën fiskale. Në kuadër të MSA-së, është propozuar që tarifa doganore për lëndët e para të bëhet zero, të aplikohet autofaturimi dhe TVSh-ja e rimbursueshme për gjithë prodhimet, rishikimin e diferencimit të akcicës së birrës, rishikimi i referencave doganore si dhe përjashtimi për një periudhë 5-vjeçare nga skema e TVSH-së për bizneset që eksportojnë. Konfindustria i cilëson ndryshimet e propozuara të nevojshme, nisur nga fakti që përfaqëson biznesin prodhues dhe njeh të gjitha problemet që i janë shkaktuar këtij biznesi. Këto propozime janë pararaqitur në Kryeministri dhe do të paraqiten në Komisionet Parlamentare përkatëse, për të debatuar mbi efektivitetin e këtyre pikave.

                                                 Propozimet

Pikat që Konfindustria propozon, kanë të bëjnë me plotësime në paketën fiskale për vitin 2007. Në kuadër të nënshkrimit të Marrëveshjes së Stabilizimit Asociimit, Konfindustria propozon që një sërë taksash të përshtaten, në mënyrë që biznesi prodhues të mos dëmtohet nga kjo marrëveshje dhe të jetë më konkurues me biznesin e vendeve europiane. Më konkretisht, vetë biznesi prodhues e ka pranuar MSA-në, por në thelb duhet që shumë pika të paketës fiskale të jenë kompetitive.

                                                   Rishikimi

Sipas Konfindustrisë, janë 17 pika që duhet të ndryshojnë në kuadër të plotësimit të kushteve të domosdoshme, për të konkuruar në mënyrë të barabartë. Bërja zero e tarifave doganore për lëndët e para, që do të thotë, biznesit prodhues t’i hapet rruga për të rritur prodhimin. Aplikimin e autofaturimit dhe TVSH-së së rimbursueshme për të gjitha prodhimet bujqësore dhe blegtorale të vendit si mish, perime, fruta, që shërbejnë si lëndë e parë për prodhimin. Udhëzimi aktual për TVSH-në, ka probleme formulimi dhe lë vend për evazion fiskal. Këto kushte të mësipërme përfundimisht e bëjnë zero, mundësinë e spekullimit në dëm të buxhetit të shtetit dhe krijojnë kushtet për aplikimin me sukses të skemës. Konfindustria kërkon rishikimin e diferencimit të akcizave bazuar në sasinë e prodhimit, sipas modelit të vendeve të BE-së si Gjermania, në lidhje me birrën. Akciza e pijeve freskuese dhe ujit të bëhet zero, të ulet akciza për karburantin solar dhe mazut në 1l lekë për litër nga 13lekë për litër, që është aktualisht. Të përjashtohen nga Tatim-Fitimi për një periudhë 5-vjeçare për kompanitë që bëjnë eksport. Tatim –Fitimi të futet në mënyrë graduale pas periudhës 5-vjeçare. Kërkohet heqja e TVSH-së për paketat turistike të kompanive shqiptare, që ****en jashtë si dhe TVSH-ja e materialeve publicitare, të jetë e rimbursueshme. Në këtë paketë kërkohet edhe zëvëndësimi i taksës prej 1 për qind për përpunuesit aktivë me një tarifë fikse shërbimi. Për më tepër, Konfindustria kërkon një kuadër ligjor të plotë, në mënyrë që ajo të jetë pjesë e Komisionit Qeveritar të Referencave, në mënyrë që të ketë një transparencë në dogana dhe ndërkohë propozohet që Konfindustria të jetë antëare në Komisionin Qendror të Apelimit.

                                             Propozimet

KONFINDUSTRIA SHQIPTARE PER PAKETEN FISKALE 2007

1- Bërja zero e tarifave doganore të lëndëve të para, ndihmëse dhe ambalazheve për prodhimet vendore (teknikisht të përdoret skema e rieksporteve). Bëhet fjalë për BE dhe vendet e treta. Kërkohet reciprocitet dhe të paktën, unifikim në politikat tregtare të Shqipërisë me BE, për tregjet e vendeve të treta.

2- Aplikimi i autofaturimit dhe TVSH-së rimbursueshme për të gjitha prodhimet bujqësore dhe blegtorale të vendit( mish, perime, fruta etj), që shërbejnë si lëndë e parë për prodhimin. Udhëzimi për TVSH nr.3 dt.30/1/2006 sot është i vlefshëm vetëm për 4 produkte dhe ka probleme formulimi, që lënë shkak për evasion fiskal. Teknikisht propozohet të përdoret Buletin çmimesh mujor i institucioneve qeveritare psh INSTAT,- kartela teknologjike për blerjet dhe kushtin, që në asnjë rast shteti të mos rimbursojë TVSH më shumë sesa arkëton për subjektin e përfshirë në skemë. Tre kushtet e mësipërme, përfundimisht e bëjnë zero mundësinë e spekullimit në dëm të buxhetit të shtetit dhe krijojnë kushtet për aplikimin me sukses të skemës së propozuar.

3- Rishikimi me qëllim diferencimin e akcizave bazuar në sasinë e prodhimit sipas modelit të vendeve të BE (p.sh Gjermania) për “birrën”.

4- Akciza e pijeve freskuese dhe ujit, të behet zero.

5-Ulja e akcizës për karburantin( “solar/ mazut”) ne 1lek/lit nga 13lek/lit.

6- Rishikimi i skemës së TVSH për makineritë e pajisjet.

7 - Përmirësimi i sistemit të vendosjes së çmimeve të referencave doganore. Sot ka probleme të ndjeshme në përcaktimin e tyre, që penalizojnë rëndë prodhuesit. Kërkohet prania e përfaqësuesit të Konfindustria Shqiptare në Komisionin Qeveritar të Referencave.

8 - Kërkohet prania e përfaqësuesit tek Konfindustria Shqiptare, si antar në Komisionin Qendror të Apelimit

9 - Të rishikohet procedura administrative e gjobës ndaj bizneseve në kuptimin që, për gabime mekanike ose intepretim ndryshe të ligjeve, tu lihet një afat kohor p.sh prej 2 javësh për sistemin e situatës. Vetem pas kësaj, të aplikohet gjoba.

10 - Taksa e ambalazhit plastik (taksë ekologjike) të paguhet si gjithë taksat e tjera në muajin pasardhës, pasi të jenë përpunuar edhe të dhënat e muajit. Sot, pagesa bëhet e veçantë brenda datës 30 të muajit.

11 – Ndërtimin e bazës së nevojshme ligjore, për zonat e lira dhe industriale.

12- Të përmiresohet Udhëzimi i Ministrisë së Financave për Magazinat Doganore të tipit A, në drejtim të moskufizimit të llojit të mallrave për llogari të të tretëve dhe rieksport. Masat janë të domosdoshme për të kthyer në konkurencial sektorin e sherbimeve të porteve shqiptare në raport me Greqinë dhe Malin e Zi.

13 - Të përjashtohen nga Tatim-Fitimi për një periudhë 5-vjeçare, kompanitë që bëjnë eksport. Të futet në mënyrë graduale pas periudhës 5-vjeçare Tatim –Fitimi

14 - Heqja e TVSH, për paketat turistike të kompanive shqiptare, që ****en jashtë

15 - TVSH e materialeve publicitare, të jetë e rimbursueshme

16 - Zëvëndësimin e taksës 1%, për përpunuesit aktive me një tarifë fikse shërbimi

17- Rishikimin, me qëllim vendosjen me çdo kusht të reciprocitetit në politikën tregtare me vendet e tjera të rajonit me rastin e nënshkrimit të CEFTA