BERAT – Një vajzë është përdhunuar nga fqinji i saj, i cili sapo ishte kthyer nga emigracioni dhe kishte shkuar për vizitë në shtëpinë e saj. Por kur ka parë se 19-vjeçarja ndodhej vetëm në shtëpi, ai e ka përdhunuar. Ngjarja mësohet të ketë ndodhur ditën e diel në lagjen “Dëshmorët e Kombit”, në qytetin e Beratit, ku një vajzë, banore e kësaj lagjeje, ka denoncuar në polici komshiun e saj për ushtrim të dhune seksuale. Burime zyrtare të komisariatit të këtij qyteti, bëjnë të ditur se mbrëmjen e ditës së diel ka mbërritur në polici J.M. Vajza ka denoncuar komshiun e saj, Gëzim Tahiri, se e kishte përdhunuar një ditë më parë. Sipas denoncimit të vajzës, ngjarja kishte ndodhur në shtëpinë e saj, ku 28-vjeçari Tahiri kishte shkuar për vizitë. I sapokthyer nga Greqia ku jeton e punon prej vitesh, Tahiri mësohet se ka shkuar në banesën e familjes së vajzës për një vizitë. Pasi ka hyrë brenda, ai ka vënë re se vajza ishte vetëm. Pasi ajo e ka qerasur fqinjin që e njihte prej vitesh, ai ka mbërthyer për krahësh vajzën, e cila ka nisur të ulërijë. Pasi e ka goditur, ai e ka përdhunuar dhe menjëherë është larguar nga banesa e saj. Pasi në shtëpi janë kthyer prindërit e saj, ajo u ka treguar ngjarjen që i kishte ndodhur. Bashkë me ta, vajza ka shkuar në komisariat, ku ka treguar gjithçka. Ndërsa vajza i është nënshtruar vizitës së mjekut ekspert i cili ka konkluduar se vajza ishte përdhunuar, kanë nisur kërkimet për 28-vjeçarin emigrant, i cili mendohet se mund ta ketë kaluar kufirin drejt tokës helene atë natë.