Porta hyrëse ajrore e Shqipërisë, ka gjasa të jetë i pari mjedis publik ku nuk do të lejohet duhanpirja. Ish-ministri Leonard Solis, u shpreh se do të ishte shumë pozitive nëse implementimi i këtij ligji nis në aeroportin “Nënë Tereza”, si porta që na lidh me vendet ku ky ligj aplikohet me sukses dhe kjo gjë reflektohet së pari në aeroportet e këtyre vendeve. Ministri i Shëndetësisë, Maksim Cikuli theksoi se ky projektligj nuk duhet kuptuar si një nismë për të ndaluar duhanpirjen në publik, por për të mbrojtuar shëndetin nga produktet e duhanit dhe se puna për hartimin e tij ka nisur vite më parë. “Ka qenë një moment shumë i rëndësishëm, kur vendi ynë firmosi Konventën për kontrollin e duhanit, e ratifikoi atë dhe tashmë jemi në momentin kur ajo është bërë efektive. Nga kjo konventë buronte detyrimi për hartimin e këtij ligji”. Sipas projektligjit, monitorimi i mjediseve publike do të bëhet nga policia bashkiake dhe ajo komunare. Për këtë qëllim, Cikuli hodhi idenë e ngritjes së një lobingu në Parlament për të siguruar strukturat e nevojshme për një implementim të suksesshëm të ligjit. Projektligji është diskutuar dje në komisionin e shëndetësisë dhe pas miratimit nga qeveria, do të kalojë për miratim në Parlament dhe përveç mbrojtjes së shëndetit nga duhani, projektligji synon edhe mbrojtjen e frekuentuesit joduhanpirës të bareve dhe restoranteve, kamarierët e shtetasit e tjerë. Ministri Cikuli theksoi se zbatimi i këtij ligji është mjaft delikat, sepse prek prodhuesit dhe ****ësit e duhanit, por dhe të gjithë shtetasit. Sipas një raporti të Organizatës Botërore të Shëndetësisë, 39 për qind e shqiptarëve janë duhanpirës, ndërsa 29 për qind llogaritet duhanpirja në vendet e BE-së. Po sipas OBSH-së, 22 për qind e sëmundjeve kanë si shkak duhapirjen, ndërkohë që kostoja financiare e trajtimit të sëmundjeve tumorale me origjinë nga duhani, arrijnë deri në 10 milionë euro. “Ky është një ligj i rëndësishëm që i kalon caqet e shëndetit dhe tashmë është bërë domosdoshmëri, pasi ne kemi ratifikuar konventën përkatëse, kemi ndjekur dhe implementimin e tij në vendet e tjera dhe në fqinjët tanë. Eshtë një iniciativë shumë e madhe”, tha tritan Shehu, kryetar i Komisionit të Shëndetësisë.