"Axurrët": Fitoren ia kushtojmë Donadonit

Kapiteni Kanavaro është mësuar me gjërat praktike. Për këtë arsye, atyre që e pyesin për lojën e bukur, ai u përgjigjet: "Morëm tri pikët..." Po, më mirë kështu. Sfida ndaj Ukrainës u kalua me sukses dhe rruga për në europian u rihap, mjafton që në Gjeorgji të mos bëhet ndonjë gabim i rëndë. "Duhet të vazhdojmë në këtë mënyrë dhe të përpiqemi t'i fitojmë të gjitha ndeshjet." Pak a shumë i njëjti koncept që shprehu edhe Del Piero. "Fitorja ishte e stërmerituar, por për t'i dhënë vazhdimësi, duhet të fitojmë të mërkurën."
Goli i tretë i Tonit - Për momentin ka menduar Luka Toni për të shënuar, i cili, pasi e fundosi Ukrainën me një dygolësh në botëror, të shtunën vendosi edhe vulën e tretë. "Është një skuadër që më sjell fat, - shpjegoi qendërsulmuesi, - dhe kësaj here mendoj se shënova një gol të madh. Nuk ishte e lehtë të gjeje hapësirat e duhura, por në fund ia dolëm mbanë dhe ishte e drejtë ta përqafonim Donadonin, i cili sikurse edhe ne po kalonte një moment të vështirë. Penalltia ndaj meje? Ishte mjaft e qartë."
Numri 10 - Me "bekimin" e Françesko Totit (pasdite i kishte telefonuar Xhixhi Rivës për ta uruar kombëtaren të fitonte), çështja e fanellës numër 10 u zgjidh në mënyrën më të zgjuar: ajo iu dha një tjetër romanisti, De Rosit. "Nuk më rëndoi. Le të themi se ia mora hua një miku vëllazëror. Megjithatë, edhe kësaj here Italia tregoi se është një skuadër shumë e fortë." Pirlo ka qenë pragmatik. "E rëndësishme ishte të fitonim. Që tredhëmbëshi të funksionojë, duhet ta provojmë më shpesh."
Grinta - Në fund të ndeshjes u panë buzëqeshjet e Iakuintës, Di Natales dhe Zambrotës, ndërsa fytyra më e zymtë ishte ajo e Bufonit. "Nuk jam i inatosur, ndihem vetëm disi 'i çuditshëm'. I kishim parashikuar vuajtjet. Pritjet e mia? Bëra vetëm detyrën time. Ndeshja ishte e vështirë dhe nëse nuk do të kishim fituar kësaj here, do të kishte qenë një rezultat negativ." Donadoni do të rrezikonte shumë. "Ia kushtojmë atij këtë sukses, - tha Gatuzo. - Rezultati ka qenë i drejtë. Na mungojnë vetëm dy pikët që lamë ndaj Lituanisë." Por Italisë do t'i mungojë edhe vetë milanisti (i pezulluar) ndaj Gjeorgjisë. Ndërkohë është e logjikshme të mendohet se do të ketë edhe rotacion, kur mund të luajnë që nga minuta e parë Kamoranezi, Pirlo dhe Nesta. Në Tbilis, Italinë do ta presë një atmosferë shumë e tendosur, kjo për shkak edhe të krizës diplomatike të Gjeorgjisë me Rusinë. Ndoshta një rezultat i mirë ndaj kampionëve të botës mund të përdorej edhe si pasqyrë e rëndësishme politike.
Ëndrra e Odos - Odo shënoi dhe festoi duke marrë edhe të birin në dhomat e zhveshjes. "Kështu e kisha ëndërruar golin tim të parë për Italinë. Pashë përreth: Del Piero nuk ishte, kështu që ia mora përgjegjësinë Pirlos dhe De Rosit. Sa i rëndë ishte topi në ato çaste? Në përgjithësi jam gjithnjë i sigurt. Ishte e rëndësishme ta zhbllokonim rezultatin dhe për fat të mirë ia dolëm mbanë. Ishte një ndeshje e vështirë, një fitore e merituar dhe një fitore e grupit."