Kryeministri Sali Berisha bën sot bilancin e premtimit zgjedhor për liberalizimin e pranimeve në shkollat e larta. Në ditën e parë të hapjes së auditoreve për vitin e ri akademik, kreu i qeverisë dhe ministri i Arsimit, pritet të inaugurojë sot Universitetin e Durrësit. Universiteti “Aleksandër Moisiu”, që ndezi një vit më parë polemika mes demokratëve të ardhur në pushtet dhe socialistëve, këtë vit do të hapë auditoret e reja paralelisht me 11 shkollat e tjera të larta shtetërore në vend. Pritet që sot të ulen në auditore studentët e parë, të cilët do të studiojnë përkatësisht në katër degë: Menaxhim-Turizëm, Anglisht, Administrim Publik dhe Cikli i Ulët i degëve jouniversitare. Fillimisht, në këtë universitet ishin parashikuar 600 kuota pranimesh, por muajin e shkuar qeveria vendosi hyrjen e lirë të të gjithë të regjistruarve në të katërta degët. Universiteti më i ri do të presë studentët e parë në ish-godinën e një shkolle 9-vjeçare pranë zonës së Currilave në qytetin e Durrësit. Ndërkohë që vetëm pak kohë pas emërimit nga Ministria e Arsimit të rektorit, Agim Kukeli, ku i fundit ka përzgjedhur edhe stafin me 20 profesorë që pritet të nisin sot vitin e ri akademik. Hapja e Universitetit të Durrësit, ishte një nismë e cila u mor nga qeveria socialiste, bashkë me dy të tjera në Fier dhe Berat. Pas ardhjes në pushtet të demokratëve, u mbyllën të tria universitetet e reja, për të rihapur brenda vetëm pak muajsh atë të qytetit bregdetar, që sipas ministrit Pollo, plotësonte kushtet për hapjen e shkollave të larta.