ATHINË. Disa fshatra pranë Selanikut u përmbytën sot nga reshjet e shumta dhe në zonë u shpall gjendja e jashtëzakonshme, njofton shërbimi i Mbrojtjes Civile. Shtatëdhjetë e pesë zjarrfikës shkuan në vendin e ngjarjes me 25 automjete për të shpëtuar banorët, njoftojnë burime pranë shërbimit të zjarrfikësve.

15:16

BAGDAD. Dy ushtarë amerikanë u vranë dje në dy incidente të ndryshme në Irak, njëri ushtar u vra në Bagdad, ndërsa tjetri në veri të vendit, deklaroi sot ushtria amerikane. Një ushtar i cili po patrullonte pjesën veriperëndimore të Bagdadit, "u vra dje nga terroristët", bën të ditur ushtria amerikane. Ndërsa një ushtar tjetër amerikan u vra si pasojë e shpërthimit të një bombe artizanale në Mosul, 370 kilometra në veri të Bagdadit, theksoi ushtria.

14:43

DURRËS. Një 25 vjeçar nga Tirana është bllokuar nga forcat e Policisë së Qarkut të Durrësit, pasi kishte kërcënuar me një granatë udhëtarët e autobusit të linjës Durrës- Tiranë. Burime zyrtare nga Drejtoria e Policisë së Qarkut bënë të ditur se forcat e policisë kanë arrestuar shtetasin Ardian Sina, 25 vjeç, nga Tirana, i cili kishte kërcënuar për motive ende të panjohura, udhëtarët e autobusit të linjës Durrës- Tiranë. Ngjarja ka ndodhur rreth orës 13.50 në superstradën Durrës - Tiranë. Burimet bënë të ditur se kanë marrë njoftim nga një prej udhëtarëve dhe kanë arritur të bllokojnë autobusin në një pikë karburanti pranë Sukthit, 10 kilometra larg Durrësit. Sipas burimeve, ende nuk dihen motivet që kanë shtyrë 25 vjeçarin nga Tirana që të kërcënojë me granatë në dorë udhëtarët e autobusit të kësaj linje.

14:12

TIRANE. Nënkryetari i Partisë Lëvizja Socialiste për Integrim, Pëllumb Xhufi, u shpreh gjatë një prononcimi për mediat, se "maxhoranca ka bllokuar zbatimin e pikave të marrëveshjes së nënshkruar në fund të gushtit nga dy partitë e politike PS-PD" . Nënkryetari i LSI-së, Xhufi, tha se " padyshim skandali i çetifikatave është një skandal i përsëritur në nivelin më të lartë kësaj rradhe dhe që përbën një shqetësim serioz në mbarëvajtjen e proçesit elektoral dhe kujtojmë se nuk është e vetmja arsye që do të mund të çonte opozitën e bashkuar në bojkot.

13:24

TIRANE. Ministri i Arsimit dhe Shkencës, Genc Pollo, deklaroi sot për mediat se, procesi i pranimeve në universitet, i cili u mbyll sipas parashikimit të udhëzimit, u krye përmes meritës, transparencës dhe korrektesës. Ai vuri në dukje se, "synimi i MASH për të tërhequr këtë vit më shumë studentë drejt degëve të rëndësishme për zhvillimin e vendit, u plotësua. Degët e Shkencave Natyrore dhe degët Inxhinierike janë sivjet për herë të parë, pas shumë vjetësh, plot me studentë të vitit të parë". Pollo u shpreh se "do të përqendrohemi në reformën e Arsimit të Lartë që studentëve t'u sigurojë një formim gjithmonë e më cilësor në përputhje me nevojat e tregut të punës".

13:17

ELBASAN. Forca të Policisë së Qarkut të Elbasanit, në bashkëpunim me ato të Korçës, gjatë një operacioni blic gjatë natës së kaluar në segmentin rrugor Elbasan - Librazhd dhe Elbasan - Tiranë, kanë bllokuar një sasi të konsiderueshme armësh në një automjet, bënë të ditur burime zyrtare nga policia lokale. Burimet thanë se "gjatë aksionit, janë ndaluar 8 persona". Sipas tyre, dyshohet se tre persona janë të implikur për trafikim ndërkombëtar armësh me destinacion Greqinë. Bëhet e ditur se ky trafikim bëhej në bashkëpunim me një shtetas grek, i cili është ndaluar nga policia, ndërsa dyshohet se janë të implikur një person nga qyteti i Korçës dhe një nga Elbasani.

13:16

TIRANE. Partia Lëvizja Socialiste për Integrim përshëndeti hapjen e vitit të ri akademik 2006-2007, si dhe premtoi mbështetjen e zhvillimeve cilësore në arsim, duke e parë atë si hapin kryesor të përfshirjes së vendit tonë në familjen e madhe europiane. Nënkryetari i LSI-së, prof. dr Sokol Axhemi, gjatë një konference për shtyp, përshëndeti sot, në emër të kësaj force politike të gjithë rininë studentore që do të mbushë nesër auditorët dhe sidomos ata studentë që këtë vit startojnë në vitin e parë të studimeve të tyre universitare.

12:22

DIWANIYA. Trupat amerikane dhe irakiane vranë mbrëmë 20 militantë të dyshuar shiitë në qytetin jugor Diwaniya gjatë përleshjeve të ashpra që po vazhdojnë ende, deklaroi ushtria amerikane. Ushtria amerikane deklaroi se forcat e saj iu kundërpërgjigjën një sulmi me granata ndërsa po hynin dje në qytetin shiit për të kryer disa operacione.

11:10

TIRANE. Komisioni Hetimor për Shkarkimet në Administratën Publike pritet t'i paraqesë parlamentit dy raporte përfundimtare, një i maxhorancës dhe tjetri i opozitës. Nesër pritet që përfaqësuesit e maxhorancës të paraqesin raportin e tyre përfundimtar, ndërkohë që opozita e paraqiti raportin e saj javën që shkoi. Nënkryetari i këtij Komisioni, Edmond Spaho, është shprehur se "ndryshimet në administratën publike janë bërë vetëm të mbështetura në kriteret e specialitetit dhe kualifikimit dhe jo në përputhje me bindjet politike, gjë e cila ka ndodhur vetëm për stafin politik të këshilltarëve".

10:58

ELBASAN. Në qytetin e Elbasanit kanë nisur tashmë punimet për rikonstruksionin e plotë të spitalit gjinekologjik, një investim i firmës turke "Kurum" me vlerë 80 mijë euro. Presidenti i kësaj firme, Zeki Kaja, ka premtuar rikonstruksionin e plotë të godinës, gjatë një takimi në janar të këtij viti me kryetarin e bashkisë, Ardian Turku. "Ne e çmojmë investimin e drejtuesve të "Kurum", falë tyre do të ndryshojnë shumë gjëra në drejtim të përmirësimit të kushteve të akomodimit dhe shërbimit spitalor", tha drejtori i Qendrës Spitalore të Elbasanit, Shefqet Deliallisi.

10:26

HANOI. Një varkë u mbyt në pjesën qendrore të Vitnamit duke shkaktuar vdekjen e dy fëmijëve dhe ndërkohë 18 të tjerë të humbur mendohet të jenë mbytur, bënë të ditur burime zyrtare. Varka u fundos dje, ndërsa transportonte nxënësit e një shkolle në provincën Nghe An, deklaroi një polic lokal. Në një njoftim të qeverisë sot thuhej se deri tani skuadrat e shpëtimit kishin nxjerrë trupat e pajetë të dy fëmijëve.

10:26

RIGA. Rezultatet e para të zgjedhjeve parlamentare të zhvilluara dje në Letoni treguan se kryeministri Aigars Kalvitis dhe koalicioni i tij i qendrës së djathtë janë drejt një fitoreje bindëse. Pas përfundimit të numërimit të votave në 970 nga 1 006 qendra votimi, partia Popullore e kryeministrit Kalvitis dhe partnerët e tij kishin siguruar 44.86 për qind të votave, sipas rezultateve të publikuara sot në mëngjes nga Komisioni Qendror Zgjedhor. Kalvitis shpalli mbrëmë fitoren e zgjedhjeve pas publikimit të rezultateve të një sondazhi paraprak nga një televizion lokal.

12:39

PESHKOPI. Disa persona ende të paidentifikuar kanë vjedhur në banesën e shtetases Rufe Shahu, banore e lagjes së Llixhave, një sasi të konsiderueshme parash e disa sende të tjera të çmuara.Në lidhje me këtë ngjarje, që është e para gjatë këtij viti në këtë qytet, policia ka shoqëruar disa persona. Ndërkohë që po punohet për identifikimin e autorëve të vjedhjes dhe mendohet se personat kanë hyrë në banesë përmes tavanit, duke hequr tjegullat e çatisë.

11:34

SALVADOR. Presidenti Toni Saca tha se policia kishte zbuluar një plan për të vrarë atë, duke qëlluar me raketë helikopterin e tij dhe e lidhi veprimin me luftën kundër krimit të organizuar dhe me bandat e drogës. Saca tha se komploti ishte organizuar nga George Nayes, një kubanoamerikan i dëbuar në USA që kërkonte të hetonte lidhjet e tij të mundshme më trafikantët kolumbianë të drogës.

11:34

SALVADOR. Presidenti Toni Saca tha se policia kishte zbuluar një plan për të vrarë atë, duke qëlluar me raketë helikopterin e tij dhe e lidhi veprimin me luftën kundër krimit të organizuar dhe me bandat e drogës. Saca tha se komploti ishte organizuar nga George Nayes, një kubanoamerikan i dëbuar në USA që kërkonte të hetonte lidhjet e tij të mundshme më trafikantët kolumbianë të drogës.