Kryetari i LSI Ilir Meta tha dje në takimet paraelektorale që zhvilloi në Pogradec e Korçë se kjo forcë politike do të shohë peshën reale të saj në këtë zgjedhje, dhe në bashkëpunim me forcat e majta do të sigurojë fitoren në zgjedhjet e ardhshme vendore. Gjatë një takimi të zhvilluar në qytetin e Korçës me strukturat dhe simpatizantët e LSI-së, zoti Meta u shpreh se “ne do të tregojmë në këto zgjedhje peshën dhe fuqinë elektorale duke u përfaqësuar për herë të parë, jo vetëm në të gjithë territorin e vendit e të gjitha strukturat e pushtetit lokal, por edhe për të realizuar ambicjen tonë për rritjen sa më të madhe të LSI-së”.
Ai tha se “LSI ka ambicje të mëdha në të gjithë Shqipërinë, ashtu edhe për Korçën me vendosmërinë që të afirmohen gjatë procesit të ardhshëm zgjedhor të gjithë kandidatët e mundshëm të Lëvizjes Socialiste për Integrim në të gjitha njësitë e qeverisjes vendore”. Por, sipas kreut të LSI, ky është një proces që do t’i nënështrohet edhe tryezës së forcave të majta opozitare. Duke u ndalur në Reformën Zgjedhore, zoti Meta tha se “ne do të vazhdojmë luftën tonë në Parlament e kudo në mënyrë që të sigurohen standardet e nevojshme për zgjedhje të lira e të ndershme”.