Pyetësori do të aplikohet nga ekspertë të huaj në bashkitë kryesore

PS, sondazh komunitetit për kandidatët e bashkive

Në datën 9 tetor, kryetari i PS-së, Edi Rama, pret një grup ekspertësh të huaj në fushën e sondazheve publike, të cilët do të përcaktojnë pyetësorin e shkurtër dhe të qartë, bashkë me modalitetet e tij për zhvillimin e një sondazhi publik. Ky sondazh, i pari i këtij lloji në Shqipëri, kërkuar nga një parti politike para zgjedhjeve, do të përfshijë qytetet kryesore, bashkitë e të cilave kanë peshë elektorale me rëndësi.

Tryeza
Konkluzionet e sondazhit do ta ndihmojnë kreun socialist për të pasur një gjykim sa më real të kandidaturave që do të mbërrijnë në kryesinë socialiste pas procesit të propozimit dhe seleksionimit nga baza socialiste. Subjektivizmi i vënë re në përzgjedhjet e mëparshme dhe klientelizmi në përzgjedhjen e kandidaturave, veçanërisht ato të pushtetit vendor, kanë detyruar kreun socialist të ketë dhe një statistikë të tijën ballafaquese për të përzgjedhur kandidatin më të votuar dhe pranuar nga komuniteti lokal. Por përfundimin e këtij sondazhi Rama kërkon ta përdorë dhe në ballafaqimin e kandidaturave socialiste përkarshi atyre të partive aleate të koalicionit opozitar në fazën e fundit të përzgjedhjes së kandidatëve të përbashkët nga tryeza opozitare. Sondazhi konsiderohet të jetë “asi” në mëngën e Ramës, që do të vendosë përfundimisht kandidatin e duhur, duke minimizuar kështu dhe pretendimet e aleatëve për zona të lira. Një përpjekje e tillë u iniciua nga PS-ja dhe në zgjedhjet e përgjithshme parlamentare të vitit 2005, madje dhe me mbështetjen e institucioneve ndërkombëtare të njohura në këtë fushë, por u anashkalua për shkak të pakënaqësive që kjo formë mund të krijonte në radhët e grupit parlamentar të legjislacionit të kaluar dhe atyre që do të kandidonin për herë të parë.

Seleksionimi
Ndërkohë i është bërë e njohur gjithë kryesisë socialiste platforma dhe kriteret mbi të cilat do të përzgjidhen kandidaturat për zgjedhjet e pushtetit vendor. Procesi i përzgjedhjes së kandidaturave, i cili do të kalojë në 5 faza, do të nisë me vetëdeklarimin e kandidatëve, ku çdo qytetar do të ketë të drejtë të kandidojë nëse plotëson kriteret e vendosura nga Asamblea Kombëtare Socialiste. Të gjitha kërkesat do të administrohen nga kryesia e PS-së, e cila do t’i klasifikojë në bazë të kritereve për t’i futur në votimin e anëtarësisë përmes parimit “një anëtar, një votë”. Më pas kandidaturat do t’i nënshtrohen votimit nga organizatat socialiste, ku tre të parët e këtij votimi do t’i kalojnë këshillit zonal. Do të jetë këshilli zonal socialist ai që do të administrojë të gjitha kandidaturat e ardhura nga votimi i organizatave dhe do të votojë për të nxjerrë më të mirat. Ky proces do të kryhet paralel dhe me gjykimin e tyre nga Forumi Qytetar, i cili do të përbëhet nga kryetari dhe sekretari i degës socialiste, nga veteranë, anëtarë të shoqërisë civile, të forumit rinor, forumit të gruas, por dhe pjesëtarë të biznesit, forum i cili do të ketë një përbërje prej 50 personash. Në fund pas këtij seleksionimi, 3 kandidaturat fituese do t’i kalojnë kryesisë së PSSH-së, e cila do të zgjedhë njërin prej tyre.