Morandi, banda pop që ka futur muzikën rumune në Evropë

Ata janë 14 dhe vijnë nga Rumania për të performuar hitet e tyre më të fundit që janë edhe ndërkombëtare. Një bandë rumune e muzikës pop që dëgjohet edhe në Shqipëri, ndërsa e anasjella fatkeqësisht nuk ndodh, siç tregon këngëtari i këtij grupi që dje në mbrëmje mbërriti në Tiranë. Kënga e tyre “Love me” ishte hit edhe në Shqipëri këtë verë, ndërsa hiti i tij i ri është “Falling Asleep”. Solisti i bandës rrëfen se bashkë me bandën e tij do të sjellë të shtunën në mbrëmje 30 minuta nga sukseset e tyre të fundit në skenën e Mikrofonit të Artë.
Një vend që po ndërtohet e quan ai Shqipërinë, ndërsa shton se Rumania tanimë është një vend që po përfundon së ndërtuari. Vjen për herë të parë në Tiranë, por jo në Shqipëri, pasi ka kënduar edhe në qytetin e Vlorës në festën e MTV. Është vetëm 24 vjeç, por është edhe kompozitor dhe i pëlqen të bëjë pak politikë nëpërmjet muzikës, duke thënë se ky ka qenë viti i Rumanisë dhe përparimi ndërkombëtar që po bën vendi i tij është shënuar edhe nga sukseset muzikore rumune.
Në fakt, përveç suksesit në Rumani, grupi Morandi ka qenë në majat e listave muzikore në MTV Europe dhe në World Chart Express. Morandi është nominuar për “Best Romanian Act” në MTV Europe Music Awards 2005, edhe pse nuk doli fitues, ndërsa në “MTV Romania Music Awards 2006”, Morandi fitoi për këngën më të mirë dhe (“Beijo”) dhe videon më të mirë (për “Falling Asleep”). Në shtator versioni i Beijo është lançuar edhe në Britaninë e Madhe përmes Apollo Recordings.


Hitet e Morandi:
Love Me (2005)
Beijo (këngë në portugalisht, 2005)
Falling Asleep (2006)
A La Lujeba (2006)


Një bandë, jo më sekrete
Morandi konsiderohet si banda që ka revolucionarizuar kohët e fundit industrinë muzikore në Evropën Lindore. Ata fillimisht ishin një studio projekt që donin të mbeteshin anonimë dhe më vonë u shndërruan në një bandë. Ata thonë se kanë dashur të mbeten sekret sepse donin të demonstronin që muzika ka nevojë për diçka më shumë sesa thjeshtë të listohet: ajo duhet shijuar.