Tetor 7, 2006

 


Pagesat për akomodimin kryhen në llogari bankare. Qiraja e strehimit, 25 mijë lekë për 9 muaj

Konviktet, katër studentë në dhomë

Brovina: Regjistrimet në QS, brenda kapaciteteve

Numri i madh i studentëve të rinj, ka detyruar drejtorinë e Qytetit Studenti të akomodojë katër studentë në një dhomë. Nga 1700 vende të deklaruara zyrtarisht në fillim të regjistrimeve, brenda një jave në Qendrën e Trajtimit të Studentëve janë strehuar 300 më tepër. “Kemi pranuar 2 mijë studentë në vitet e para, ndërkohë që kapaciteti total është 6880 studentë për të katërta vitet”, - tha Bujar Brovina, drejtor i Qytetit Studenti. Pritet që në ditët në vijim ky proces të vijojë ende jo vetëm për regjistrimet e reja, por edhe me çregjistrimet që mund të kryejnë studentët nga njëra degë në tjetrën. Drejtori Brovina theksoi se përpos numrit të madh të kërkesave, procesi i regjistrimeve ka vijuar mëse normal dhe pa radha të gjata, siç ka ndodhur për çdo vit. Regjistrimet e sivjetshme të parashikuara nga tre shtretër në çdo dhomë, janë rritur me një më shumë dhe kjo sipas drejtuesve të Qytetit Studenti, ka ardhur për shkak të fluksit të madh të studentëve të pranuar në vitin e parë.
Regjistrimet
Brenda tetë ditëve të fundit të regjistrimeve në konvikte, Qendra e Trajtimit të Studentëve nr.1 në kryeqytet, ka akomoduar rreth 2 mijë të rinj të vitit të parë. “Nuk ka pasur asnjë problem, pasi të gjithë studentët vijnë me vërtetim nga fakultetet dhe regjistrohen në godinat përkatëse, të cilat ndryshe nga vitet e shkuara sivjet janë të ndara sipas fakulteteve”, - tha Bujar Brovina, drejtor i Qytetit Studenti. Sipas Brovinës, numri i madh i studentëve të vitit të parë, i ka detyruar ata që të mos lënë asnjë student pa akomodim, për këtë qëllim janë marra masa që në një dhomë të ketë nga katër studentë. Vetëm për këtë viti akademik, numri i pranimeve të reja në Universitetin e Tiranës arrin në 3200, ku më shumë se gjysma e tyre vijnë nga rrethet. Gjatë këtyre ditëve fluksi i regjistrimeve ka ecur me ritme normale, veçanërisht për vitet e ndërmjetme, të cilat ndryshe nga vitet e shkuara nuk kanë pësuar asnjë ndryshim në dhoma, por janë akomoduar aty ku kanë qenë strehuar më parë. Ndërkohë që janë përjashtuar nga e drejta e strehimit të gjithë studentët që vijnë nga rrethinat e kryeqytetit apo Durrësi dhe kjo ka ndodhur për shkak të numrit të kufizuar të kapaciteteve të Qytetit Studenti.
Pagesat
Ndryshe nga vitet e shkuara, drejtoria e Qytetit Studenti sivjet ka disiplinuar pagesat e tarifës së akomodimit. Studentët e viteve të ndërmjetme, pra atyre të dyta, treta dhe të katërta, kanë kryer pagesat përkatëse në numrin e llogarisë bankare të Qendrës së Trajtimit të Studentëve nr.1, për të evituar pagesat nën dorë që mund të kryheshin me kujdestarët e godinave. “Sivjet ka një disiplinim të akomodimeve dhe pagesave për vitet e ndërmjetme, kjo për faktin se pagesat kryhen në një numër llogarie bankare të caktuar dhe studentët duhet të paraqesin vetëm mandatpagesën për t’u regjistruar”, - tha drejtori Brovina. Kreut i Qytetit Studenti ka sqaruar se tarifa e regjistrimit në Qytetin Studenti edhe pse ka pësuar një rritje, duke arritur në 25 mijë lekë të reja, të gjitha detyrimet janë shlyer në bankë. “Kjo procedurë nuk është ndjekur me vitet e para, por në konvikte. Edhe ky proces ka qenë tejet transparent, pasi drejtoria ka vendosur një dublant për kujdestarët jo vetëm për kryerjen e pagesave, por edhe për të ndihmuar në akomodimin e shpejtë të studentëve”, - theksoi drejtori i Qytetit Studenti.