6,tetor,2006

Fabien Barthez ka lajmëruar të enjten largimin e tij nga futbolli.  Portieri 35-vjeçar i cili kishte fituar titullin e kampionit të botës me kombëtaren franceze në botërorin e vitit 1998 e ka konfirmuar vetë lajmin në një emision televiziv të kanalit francez TF1.

“Po largohem nga kombëtarja franceze, po largohem fare nga futbolli”, ka thënë Barthez, i cili ka zhvilluar ndeshjen e tij të fundit me “Les Bleus” në finalen e botërorit “Gjermania 2006” kishte mbetur pa skuadër prejse Marseille e kishte liruar nga kontrata në fund të edicionit të kaluar. Barthez, i cili ka luajtur më parë me Toulouse, Monaco dhe Manchester United ka thënë se “do të vazhdoj të kënaqem me jetën edhe pa futboll”.

Përveç triumfit në Botërorin 1998, Barthez ka fituar edhe Kampionatin Evropian në vitin 2000 dhe ka qenë portier i Marseille kur skuadra e Lorik Canës kishte fituar Kupën e Kampionëve në vitin 1993. Titulli i ishte marrë skuadrës mesdhetare pasi ishin shpallur fajtor në një aferë të ngjashme me atë që ka ngjarë së fundmi në Serie A.

Barthez e kishte filluar karrierën e tij profesioniste në vitin 1990 me skuadrën e Toulouse. Në vitin 1995 i ishte bashkuar skuadrës së Monacos, ndërsa pesë vite më vonë largohet në drejtim të Manchester United. Në sezonin 2003-04 rikthehet në Marseille.

Pas përfundimit të Botërorit “Gjermania 2006’ Barthez kishte kërkuar që ti bashkohet skuadrës së tij të parë, Toulouse, por palët nuk kishin rënë dakord për një gjë të tillë.

“Klubi i vetëm ku dëshiroja të shkoj nuk më deshi”, tha Barthez. “Gjëra të tilla ndodhin dhe unë duhet ta pranoj këtë. Dëshiroja edhe një aventurë”. Tullaci Barthez i cili ishte i njohur për reflekset e jashtëzakonshme por edhe për gabimet e tij qesharake, ka zhvilluar 87 ndeshje me kombëtaren franceze.

                                            Pergatiti: Arbi: Arbi_1999@hotmail.com