Procesi ndaj të akuzuarit për pedofili.Tregohet dokumenti për Braun

Avokatja: Lirojeni anglezin, s’është i aftë të bëjë seks

Administratori i dikurshëm i qendrës "Fëmijët e tij", 55-vjeçari David Braun, nuk është i aftë të kryejë marrëdhënie seksuale dhe rrjedhimisht akuza e ngritur ndaj tij për abuzim seksual me fëmijët është e pabazuar.

Ky qe pretendimi i ngritur dje në Gjykatën e Tiranës nga avokatja e Braunit, e cila ka pretenduar se klienti i saj vuan nga impotenca seksuale dhe se është akuzuar nga Prokuroria padrejtësisht. Deklarata u bë në një seancë, ku u shqyrtua kërkesa për revokim të masës ndaj shtetasit anglez, David Braun. Avokatja e anglezit, Kristina Galloshi, tha para gjykatës së klienti i saj është i pafajshëm dhe duhet të lirohet sa më parë. Po dje gjykata i kishte vënë në dispozicion të pandehurit përkthyesin e licencuar të gjuhës angleze, pas kërkesës së vetë të pandehurit një seancë më parë. Me anë të përkthyesit, 55-vjeçari i kërkoi gjykatës të lirohej me pretendimin se është i pafajshëm dhe se nuk kishte kryer asnjë abuzim me të miturit, përveç faktit se kishte kryer bamirësi me ta.

SEANCA NE GJYKATE
"Ne kemi bërë një akt-ekspertimi, në të cilin vërtetohet se Braun nuk mund të kryejë marrëdhënie seksuale", deklaroi avokatja Galloshi. Sipas saj, të gjitha aktet e Prokurorisë duhet të deklarohen të pavlefshme, pasi nuk janë bërë në përputhje me ligjin. Ndërkohë që, sipas prokurorit të çështjes, pavarësisht faktit se Braun nuk mund të kryejë marrëdhënie seksuale, ai ka përdorur qendrën e tij për të shfrytëzuar seksualisht fëmijët ndaj personave të tjerë. Avokatja e Braun ka kundërshtuar edhe vendimin e Prokurorisë për të shtuar afatet e hetimit edhe për tre muaj të tjerë, pasi, sipas saj, ky institucion ka pasur kohën e mjaftueshme për të përfunduar këtë hetim brenda kësaj periudhe. Ndërkohë që prokuroria dy javë më parë zgjati afatet e hetimit edhe për 3 muaj të tjerë, i akuzuari si pedofil, anglezi 55-vjeçar David Braun dhe njëkohësisht drejtuesi i fondacionit "Fëmijët e tij", nuk ka mundur të shpëtojë nga "arresti në burg" edhe pas kërkesës që bëri në Gjykatën e Apelit për ndryshim të vendimit të dhënë nga Shkalla e Parë. Prokuroria pret një letër-porosi nga Anglia për ish-kujdestarin e fondacionit, Dino Kristodulo dhe të Robin Arnold për të ballafaquar faktet. David Braun, i mbështetur edhe nga një pjesë e fëmijëve të fondacionit që drejtonte, i ka shpjeguar gjykatës se nuk është fajtor për këtë ngjarje, madje ai ka thënë se dy vjet më parë ka denoncuar abuzimet te "PAMECA". Nga ana e tij, organi i Prokurorisë është shprehur se David Braun ka pasur dijeni për këtë "skandal", por nuk ka bërë denoncim zyrtar, duke u mjaftuar vetëm me dhënien e disa fakteve gojarisht. Akuza me të cilën Braun do të qëndrojë në arrest burgu është ajo e "marrëdhënieve seksuale me të mitur". Ndërsa mbrojtja e Braunit pretendon se atij i ka kaluar afati tremujor i hetimit dhe rrjedhimisht duhet të lirohet, pasi Prokuroria e kishte kohën e mjaftueshme për të vërtetuar akuzat në ngarkim të tij.

                                                                       A.Hoxha: Arbi_1999@hotmail.com