Sekretaritë e fakulteteve, hapur me 5,6,7 dhe 8 tetor

Universitetet, regjistrimet vazhdojnë deri në fundjavë

Edhe katër ditë të tjera në dispozicion të regjistrimeve në universitete. Ministria e Arsimit ka nxjerrë dje udhëzimin e fundit, i cili parashikon të tjera raunde regjistrimesh, të cilat startojnë sot dhe mbyllen ditën e diel. “Sipas udhëzimit të ri të Ministrisë së Arsimit dhe Shkencës, gjatë katër ditëve në vazhdim do të ketë raunde të tjera regjistrimesh për kandidatët në universitet sipas rendit zbritës të pikëve”, - tha zëdhënësja e dikasterit të Edukimit. Vendimi është marrë dje pas një takimi që ministri Genc Pollo pati me rektorët e universiteteve, të cilët sugjeruan që pranimet për vendet e mbetura bosh në degët me kuota të mbyllura, të vazhdojnë sipas rendit zbritës të pikëve në të njëjtën mënyrë edhe për 4 raunde të tjera  në datat 5, 6, 7 dhe 8 tetor. Ndërkohë, rektorati i Universitetit të Tiranës ka sqaruar dje se regjistrimet do të vijojnë sipas udhëzimit të Ministrisë së Arsimit dhe nuk do të pranohen regjistrime bazuar në kërkesat e kandidatëve për studentë, por vetëm duke iu referuar kandidatëve të shpallur fitues nga fakultetet. Sipas udhëzimit, vetëm për sot regjistrimet do të startojnë nga ora  12.00 deri orën 19.00 pranë sekretarive të fakulteteve sipas rendit zbritës dhe listave të afishuara në universitete. Pas përfundimit të orarit, fakultetet do të shpallin menjëherë vendet e mbetura bosh dhe nëse do ketë sërish vende të mbetura bosh, regjistrimet do të vazhdojnë në datat 6, 7 dhe 8 tetor, nga ora 09.00 deri 15.00. Udhëzimi sqaron se për secilën nga këto ditë, në përfundim të orarit të regjistrimeve, fakultetet do të shpallin kuotat e paplotësuara. Ndërkohë, Ministria e Arsimit u ka bërë thirrje të gjithë kandidatëve të ndjekin këto ditë me kujdes çdo zhvendosje të listës së të regjistruarve. Një ditë më parë Universiteti i Tiranës ka deklaruar plot 597 vende të paplotësuara në 15 degë, ndërkohë që tre ditë më parë kuota e vendeve bosh ishte 541. Rektorati i Universitetit të Tiranës sqaroi se rritja e kuotave bosh ka ndodhur për shkak të çregjistrimeve të kandidatëve, të cilët kanë hequr dorë prej tyre dhe janë regjistruar në degët e tyre të preferuara.

       Pergatiti:Arbi Hoxha                       Arbi_1999@hotmail.com