Pranga sekserëve që trafikuan tetë klandestinë drejt Italise

Klandestinët kaluan me gomone dhe u arrestuan në Itali.

Durrës- Policia e Durrësit ka arrestuar dy persona, të cilët akuzohen se kanë përgatitur kalimin me gomone për në Itali të tetë shtetasve shqiptarë.

Burime nga policia e Durrësit thanë se kanë arrestuar Julian Aruzin, 28-vjeç dhe Ardian Kalushin, 22-vjeç nga Durrësit.

Sipas burimeve policore, këta shtetas dyshohet se kanë kryer misionin e sekserit për të gjetur klandestinët që u trafikuan me një gomone e cila është nisur nga bregdeti i Rrushkullit me datën 30 Shtator 2006.

Gomonia u bllokua me 8 klandestinë në bord në bregdetin e Otrantos në Itali.

Gomonia me 8 klandestinë u bllokua nga forcat e Guardia di Finanza.

Policia e shtetit ka nisur kohët e fundit një aksion të gjerë policor në bregdetin e Durrësit, për të luftuar trafikun e qenieve njerëzore dhe lëndëve narkotike që transportohen me mjete lundruese.

Operacioni është organizuar nga ana e drejtorisë së përgjithshme të policisë së shtetit, sektori i policisë kriminale, në bashkëpunim me misionin italian të Guardi di Finanza.

Në territorin e policisë së qarkut të Durrësit kanë vepruar 5 grupe operacionale, nga të cilët një nga deti dhe tre nga toka.

Sipas burimeve zyrtare, grupi që veproi në vijën bregdetare nga Përroi i Agait deri në Urën e Dajlanit, kontrolloi anijet e peshkimit të dala për gjueti, vijën bregdetare nga Currilat deri në Porto Romano.

Grupi tjetër ka kontrolluar të gjitha peshkarexhat që kishin dalë për lundrim.

Policia ka kontrolluar 5 peshkarexha, të cilat kanë rezultuar me dokumentacion të rregullt, si dhe sanallë lundrimi, të cilët gjithashtu nuk kanë pasur probleme.

Janë kontrolluar lokalet “Vjosa”,”Kacmoli”,”Pista Iliria”, ku nuk u konstatuan shkelje.

Policia ka krehur dhe zonën e Bishtpallës, Fshatin Rinia deri në derdhje të lumit Erzen.