Lajme

4,tetor, 2006

  Ekonomisti Ergys Xibinaku, shumën e "përfituar" e la brenda një javë në bastet sportive  

Arkëtari i vjedh 5 milionë lekë "Sheraton"

Drejtori i hotelit denoncoi punonjësin e tij, arrestohet

                                    TIRANE

Ka gjetur një mënyrë "origjinale", arkëtari i hotelit "Sheraton" Tirana, për të siguruar paratë e nevojshme për të luajtur në bastet sportive. Duke përfituar ndoshta nga "rrëmuja" e krijuar prej lëvizjet e shumta dhe vëmendja e përqendruar në sigurinë e diplomatëve të huaj të ardhur për takimin Ministerial të Vendeve të Evropës Juglindore dhe SHBA-së, ku ka marrë pjesë dhe Sekretari Amerikan i Mbrojtjes, Rumsfeld, ai ka mundur të përvetësojë plot 5 milionë lekë të reja nga arkëtimet. Vetë drejtori i hotelit "Sheraton" e ka denoncuar në Komisariatin numër 1 të Policisë së Tiranës, arkëtarin 26-vjeçar, Ergys Xibinaku. Ka realizuar një mënyrë të thjeshtë Xibinaku, duke mos i regjistruar derdhjet në arkën e financës së hotelit dhe shumat përkatëse i hiqte mënjanë. Por nuk ka funksionuar më shumë se një jave kjo mënyrë vjedhjeje, pasi rreth orës 22.30 të mbrëmjes së të hënës, 26-vjeçari është arrestuar nga shërbimet e Komisariatit numër 1 të Policisë.
Vjedhja
Kishte një javë që një pjesë të konsiderueshme të derdhjeve të arkës së financës, Xibinaku nuk i kalonte në arkën e financës. I ka besuar shumë fatit duke i luajtur lekët e vjedhura në lokalet e basteve sportive. Ndoshta me mendimin se mund të fitonte dhe t'i zëvendësonte ato. Por nuk ka mundur të fitojë asnjë "dorë" të rëndësishme bastesh, duke i humbur të 5 milionë lekët në kumar. Nuk ka qenë e vështirë për të verifikuar vjedhjen në fjalë nga oficerët e antikrimit të policisë. Ka mjaftuar vetëm kontaktimi me lokalet e basteve, të cilët kanë konfirmuar shumat e mëdha të lekëve të humbura nga Xibinaku. Vetë ai nuk ka mundur ta shmangë akuzën, ndonëse nuk ka dhënë detaje rreth vjedhjes.
Hetimi
Nuk ka pasur asnjë dyshim që Xibinaku kishte përfituar duke shfrytëzuar detyrën si arkëtar, shuma të hollash nga të ardhurat e hotelit. Ky fakt është konfirmuar nga burimet policore pranë komisariatit. Hetuesit kanë kërkuar inventarin e të gjitha veprimeve financiare të kryera nga 26-vjeçari gjatë javës kur dyshohet të jetë kryer vjedhja. Xibinaku është siguruar në ambientet e izolimit të Komisariatit numër 1 të Policisë së Tiranës, dhe ndaj tij Prokuroria e rrethit ka nisur procedimin penal me akuzën e vjedhjes së kryer me anë të shpërdorimit të detyrës.

    Pergatiti : Arbi Hoxha: Arbi_1999@hotmail.com

-- Edited by ArBi at 12:12, 2006-10-04