Nëse shikon një fotograf nëpër qytetet e Evropës Perëndimore dhe e quan paparac, ai mund të të qëllojë me aparat, veçanërisht nëse e konsideron veten fotoreporter. Po kush është diferenca midis tyre? Përgjigja është më e thjeshtë se ç’mund të imagjinohet. “Paparac” në shqip do të thotë “insekt që zukat”. Në vitin 1960, këta fotoreporterë u bënë të njohur me filmin “Dolce vita”, të regjisorit italian Frederico Felini. Ai trajtonte historinë e Marçellos, një gazetari të lodhur nga profesioni i tij dhe nga ambienti në të cilin qarkullon. Personazhi që e shoqëron gjatë gjithë filmit është kolegu i tij fotograf, me emrin Paparazzo (Walter Santesso). Origjina e emrit paparazzo është e diskutueshme, por ngjashmëria e këtij emri me emërtimin në dialektin sicilian të një mize e bëri Felinin që të bënte krahasimin, i cili do të ngelej në vitet në vazhdim identifikues për këtë zhanër fotografësh: “Paparaci më sjell ndërmend një insekt të bezdisshëm, thumbues dhe të vrullshëm”. Shtyrë nga ky përfundim, Felini pikturoi edhe një karakter që personifikonte paparacin. Piktura tregon një njeri, që duket sikur nuk ka kocka dhe që të sjell në mend një insekt gati për të sulmuar. Ky është edhe momenti në të cilin ka filluar që të përdoret ky emër. Përfundimisht termi “paparac” hyri në përdorim në gjuhën angleze, pas shfaqjes së filmit “Dolce vita” në SHBA. Fillimisht doli si titull në një artikull të revistës “TIME” e më pas u shpërnda me shpejtësi në tërë globin. Gjithsesi, ky term nuk u përdor kurrë si kompliment, apo si vlerësim